د خیبر پښتونخوا د مالي چارو سلاکار مزمل اسلم د پاکستان د اوسني لومړي وزیر شهباز شریف د حکومت پر مالي پالیسیو توندې نیوکې کړي او ویلي یې دي چې د نوموړي حکومت په تېرو دوو کلونو کې ۲۷ زره میلیارده روپۍ پور ترلاسه کړی چې دا د خیبر پښتونخوا د ۲۸۷۰ کلونو پور سره برابرېږي.
نوموړي د خبرو پر دوام ویلي: « د شهباز شریف حکومت یواځې په یوه میاشت کې د خېبرپښتونخوا د ۷۷ کلونو د پورونو هومره پور ترلاسه کړی.» نوموړي زیاته کړې دغو درندو پورونو د پاکستان اقتصاد له پښو غورځولی.
مزمل اسلم له ۱۷۵ څخه ۲۸۰ پورې د پاکستاني روپۍ راټيټېدل هم د پورونو د زياتوالي مهم لامل بللی.
د پاکستان د بهرنیو اسعارو زیرمې د صادراتو د کمېدو، د وارداتو د زیاتوالي او د بهرنۍ پانګونې د کمېدو له امله په چټکۍ سره کم شوې چې دې چارې د پاکستان حکومت اړ کړی چې د بهرنیو اسعارو د اړتیاوو د پوره کولو لپاره له نورو هېوادونو پور واخلي.