له کابل څخه خپرېدونکې ورځپاڼې(مسیر) په خپله نننۍ سرلیکنه کې په جگړه ځپلو سیمو کې د بیارغونې په پڅو کارونو بحث کړی دی.
ورځپاڼې لیکلي، په تېرو شلو کلونو کې د نړیوالې ټولنې د کلکې پاملرنې او همکارۍ سربېره په هېواد کې ځینې سیمې له پاملرنې وغورځول شوې، چې یادې سیمې هم جگړو وځپلې، هم د سیمو خلکو ژوند له ستونزو ډک و او د بیارغونې له بهیره پاتې شول.: «کله چې اوسنی حکومت واک ته ورسېد، نو یو له لومړنیو ژمنو څخه یې دا وه چې جگړو ځپلو سیمو ته به لومړیتوب ورکوي او د بیا رغونې پروژې به هلته پیلوي. دا ژمنه د خلکو د هیلو یوه تازه څپه وه چې د ډېرو لپاره یې راتلونکې ته د امېدونو دروازې پرانیستلې. خو د وخت په تېرېدو سره او د نوي سرپرست حکومت د واکمنۍ په جریان کې، چې په ټول هیواد کې سوله هم ټینگه شوې او جگړه پای ته رسېدلې، بیا هم دغه جگړې ځپلې سیمې اوس هم هماغسې محرومې پاتې دي.»
د سرلیکنې له مخې، حکومت ته پکار ده هغو سیمو ته لومړیتوب ورکړي چې په جگړو کې ځپل شوي. دغه سیمې نه یوازې د فزیکي زیانونو څخه ځورېږي، بلکې د خلکو روحي او رواني حالت هم سخت اغېزمن شوی دی. دوی نه یوازې د خپل ژوند په کیفیت کې د پام وړ بدلونونه غواړي، بلکې دا هم غواړي چې د خپلو اولادونو لپاره یوه روښانه راتلونکې ولري.: «د حکومت له خوا ځینې پرمختیایي پروژې پیل شوې دي، خو دا پروژې تر ډېره حده مرکزي سیمو ته محدودې دي. په داسې حال کې چې جگړو ځپلې سیمې لاهم په دې تمه دي چې د حکومت له خوا ورته پاملرنه وشي. حکومت باید دې واقعیت ته پام وکړي چې د هېواد هره سیمه د بیا رغونې او پرمختگ مستحقه ده، خو جگړو ځپلې سیمې په ځانگړي ډول د فوري او جدي پاملرنې غوښتنه کوي.»
د سرلیکنې د لیکوال په باور، د جگړو ځپلو سیمو د خلکو اعتماد تر ډېره د حکومت د کړنو پورې تړلی دی. دوی تمه لري چې حکومت به خپل مسوولیت په ښه توگه ترسره کړي او د دوی لپاره به یو امن او هوسا ژوند برابر کړي.: «حکومت باید د بیا رغونې پروژې په جگړو ځپلو سیمو کې په چټکۍ سره پیل کړي. دا به نه یوازې د سیمې د خلکو ژوند په مثبت لور بدل کړي، بلکې د هېواد په کچه به د پرمختگ او سوکالۍ لامل شي. د جگړو ځپلو سیمو لپاره پاملرنه کول، د ټولنې د متوازن پرمختگ لپاره یو اساسي گام دی. که حکومت په دې برخه کې جدي وي، نو دا به د هېواد د ثبات او سوکالۍ په برخه کې یو مهم گام وي.»