د اوبو او انرژۍ وزارت سرپرست، ملا عبدالطیف منصور د کمال خان بند د درېيم فاز د پرانیستې په مراسمو کې ویلي چې، سرپرست حکومت په هېواد کې امنیت، اسلامي نظام او اقتصادي پراختیا رامنځته کړې او له خلکو تمه کېږي چې د دوښمن د تبلیغاتو پر وړاندې ویښ او بیداره و اوسي.
ښاغلي منصور ویلي چې:«د سرپرست حکومت رهبري د وچکالۍ وضعیت او د خلکو اړتیاوو ته په کتو د هېواد د اوبو مدیریت ته ژمن دی او په دې هکله ګاونډي هېوادونو ته ډاډ ورکوي، چې د دغه بند له جوړولو څخه به هېڅ هېواد زیانمن نه شي.»
د اوبو او انرژۍ وزارت د خبرپاڼې له مخې، کمال خان بند د هېواد له لویو بندونو څخه دی، چې د نیمروز ولایت په چهار برجک ولسوالۍ کې د موسمي سېلابونو د کنټرول، د ۵۲ میلیونه متر مکعبه اوبو د ذخیره کولو، د ۶ مېګاواټه برېښنا د تولید او د اوبو وضعیت ته په کتو د ۱۷۴۰۰۰ هکتاره کرنیزې ځمکې د خړوبولو وړتیا لري.