د ملي دفاع وزارت وايي، د وروستیو واورو او ورښتونو له امله په گڼو ځایونو کې ځینې هېوادوال بند پاتې وو، چې د دغه وزارت له لوري ژغورل شوي دي.
له یاد وزارت څخه په خپره شوې خبرپاڼه کې ویل شوي، د٢٠٣ منصوري قول اردو اړوند امنیتي او دفاعي ځواکونو د غزني په ده یک ولسوالی د رامک په غرونو کې یو شمير بند پاتې کوچیان وژغورل او مالونه يې د نظامي وسایطو په مرسته خپلو سیمو ته ولېږدول شول.
د خبرپاڼې له مخې، په کندهار کې هم د هوايي ځواکونو له لوري دوه تنه هغه هېوادوال چې درې ساعته په اوبو کې د سېلابونو د راوتلو له امله بند پاتې وو، راوویستل شول او د یاد ولایت سیمهییز روغتون ته ولېږدول شول.
د ملي دفاع وزارت د معلوماتو پر بنسټ، پرون یې ۲۰۳ منصوري قول اردو د لوگر په ځینو سیمو کې هم ۶۰ تنه هېوادوال چې په واورو کې بند پاتې وو، ژغورلي دي.ملي دفاع وزارت ژمنه کړې، چې د ملي دفاع وزارت امنیتي او دفاعي ځواکونه د طبیعي پېښو پر مهال ۲۴ ساعته د خپلو هېوادوالو په چوپړ کې دي او هڅه کوي چې د سر او مال ژغورنه یې وکړي.
د ملي دفاع وزارت د هېواد په گوټ ـ گوټ کې ټولو امنیتي او دفاعي ځواکونو ته امر کړی، چې په هر ډول حالاتو کې د خپلو هېوادوالو د ځان او مال ساتنه وکړي.