د پاکستان پارلمان د جمعې په ورځ د کب پر ۱۱ مه د پخواني صدراعظم عمران خان د ملاتړو وکیلانو د مخالفت سره سره، خپل رئیس وټاکه.
د پاکستان د نوي پارلمان ۳۳۶ وکیلانو په دغه هېواد کې له عمومي ټاکنو درې اونۍ وروسته د پنجشنبې په ورځ لوړه وکړه او جمعې ورځ یې د پارلمان لپاره د مسلم لیګ نواز ګوند غړی سردار ایاز صادق د نوي رییس په توګه وټاکه.
په پاکستان کې د فبرورۍ ۸ مې په ټاکنو کې، چې پکې د پراخو درغلیو تورونه لګېدلي، د زنداني شوي عمران خان د تحریک انصاف ګوند پلویانو تر نورو ګوندونو زیاتې رایې وګټلې؛ خو د نوي حکومت جوړولو د پاره مسلم لیګ ن له پیپلز ګوند سره ایتلاف کړی، ترڅو تحریک انصاف حکومت جوړولو ته لار ونه مومي.
د پارلمان د رئیس د ټاکلو پر وخت د تحریک انصاف ملاتړو وکیلانو د پارلمان پر پخواني رئیس انتقادونه وکړل.
هغه نن په پارلمان کې د نوي رئیس له پاره د رایې اچونې څارنه کوله.د تحریک انصاف ملاتړي وکیل عمر ایوب خان وویل: “څنګه یو بهرنی کس کولی شي په رای اچونه کې برخه واخلي؟ تاسو څنګه کولی شئ د عمران خان ګوند، چې قانوني حق لري، له ټاکنو خارج کړئ؟”د ملي اسامبلۍ د ریاست له پاره په ټاکنو کې سردار ایاز صادق د تحریک انصاف کاندید ته د ۹۱ په مقابل کې په ۱۹۹ رایو ماتې ورکړه.
د تحریک انصاف ملاتړي ادعا کوي، چې د فبرورۍ په ټاکنو کې پراخه درغلي شوې ده، په دغو ټاکنو کې له ګډون څخه د تحریک انصاف ګوند منع شوی و او کاندیدان یې مجبور شول، چې په خپلواک ډول په ټاکنو کې برخه واخلي.
سردار ایاز صادق د مسلم لیګ نواز او پیلپز ګوند په تېر ایتلافي حکومت کې هم د پارلمان رئیس و، چې په ۲۰۲۲ کال کې یې پخوانی صدراعظم عمران خان سلب اعتماد او شهباز شریف یې پر ځای وټاکه.