د افغانستان د ملي دفاع وزارت وايي، د حضرت ابو عبیده بن جراح ملي دفاع پوهنتون اړوند د حضرت معاذ بن جبل رضي الله عنه د ملي پوځي اکاډمۍ د څلور کلونو زدهکړو لپاره یې له ۲۵۲۲ تنو داوطلبانو څخه ازموینه اخیستې ده.
له یاد وزارت څخه په خپره شوې خبرپاڼه کې ویل شوي، یاده ازموینه پرون په څلورو ځایونو کې په پوره نظم او روڼتیا سره اخیستل شوې ده.
په خبرپاڼه کې ویل شوي، له ذکر شوو داوطلبانو څځه به ۲۵۰ تنه د شرایطو له پوره کولو وروسته یادې اکاډمۍ د څلورو کلونو زدهکړو لپاره ومنل شي.
د ازموینو ملي ادارې چارسمبالي مشر شیخ عبدالباقي حقاني د ازموینې پر مهال ویلي، له اسلامي سرحداتو، خاورې، خلکو او ملي منافعو څخه دفاع کول افضل جهاد دی.:«افغان ولس يو مسلمان ولس دی او دوی اسلامي نظام غواړي، ځکه خو دلته نور نظامونه بقا نه لري. تاسې شاهد ياست، په دې هېواد کې چې کومو حکومتونو د اسلامي ارزښتونو ساتنه نه ده کړې؛ په مقابل کې يې جهادونه شوي او هغه حکومتونه له منځه تللي دي.»
نوموړي ویلي، اوسنۍ عصري نړۍ سره د سيال کېدو په موخه د ديني زده کړو ترڅنگ عصري زده کړې مهمې دي او له مسوولینو یې وغوښتل، چې په دفاعي پوهنتون کې ځوانانو ته داسې روزنه ورکړي، چې د اوسني عصر سره برابرې وي او هېواد مو د سيمې هيوادونو سره همسيال شو.:«د ازموينو ملي ادارې په تخنيکي سيستم کې انساني لاسوهنه نه کېږي او نه به چا ته اجازه ورکړو، چې د مستحق کس حق ضايع کړي.»
د ابو عبیده بن جراح(رضي الله عنه) ملي دفاع پوهنتون د پوځي اکاډمۍ ښوونې او روزنې مرستيال ملا محمد رحيم صياد په خپلو خبرو کې وويل: په دې پوهنتون کې به داسې ځوانان روزل کېږي، چې په پوره قوت سره به له اسلامي سرحداتو، خاورې، خلکو او ملي منافعو څخه دفاع کوي.نوموړي زياته کړه: کله چې يو محصل په دې پوهنتون کې جذب شي، لومړی يو کال عموميات لولي او تر هغې وروسته په بېلابېلو څانگو(حقوق، رياضي، کيميا او نورو) کې اختصاصي زده کړو ته شاملېږي.