د افغانستان د ملي دفاع وزارت وايي، د ۲۱۵ عزم قول اردو په دویمه پلې لوا کې ۱۶عرادې وسایط ترمیم کړي دي.
له یاد وزارت څخه په خپره شوې خبرپاڼه کې ویل شوي، د ۲۱۵ عزم قول اردو اړوند د هلمند د دويمې پلې لوا په ورکشاپونو کې ۱۶ عرادې بېلابېل ډول وسایط ترمیم او گټې اخیستنې ته چمتو شول.
د خبرپاڼې له مخې، په ترمیم شوو وسایطو کې ۱۰ عرادې هاموي ټانگونه، درې عرادې انټرنېشنل موټر او درې عرادې امبولانس موټر شامل وو.
د ملي دفاع او کورنیو چارو وزارتونو له دې وړاندې هم گڼ هغه وسایط بېرته ترمیم کړي دي، چې ځینې برخې یې تخریب شوې وې.
د ملي دفاع وزارت وايي، د دغه وزارت په اړوند ورکشاپونو کې گڼ وسایط اوسمهال د ترمیم لاندې دي، چې له ترمیم وروسته به د افغان پوځ په واک کې ورکړل شي.