د افغانستان د اوسپنې پټلۍ اداره وايي، تېره اوونۍ له دې لارې ۸۲۸۱۳ زره مټریک ټنه توکي لېږدول او وارد شوي دي.
له یادې ادارې څخه په خپره شوې خبرپاڼه کې ویل شوي، د حیرتان اوسپنې پټلۍ له لارې (۶۸۲۴۱) ټنه، د آقینې اوسپنې پټلۍ له لارې (۷۰۴۵) ټنه، د تورغونډۍ اوسپنې پټلۍ له لارې (۷۰۴۳) ټنه او د خواف-هرات اوسپنې پټلۍ له لارې (۴۸۴) ټنه انتقالات چې ټولټال (۸۲۸۱۳) ټنه نفتي، غیر نفتي او نور مواد دي، هېواد ته وارد او صادر شوي دي.
په خبرپاڼه کې ویل شوي، د افغانستان د اوسپنې پټلۍ اداره هڅه کوي، ترڅو د لا زیاتو انتقالاتو لپاره مناسب شرایط برابر او سوداگرو ته اړینې اسانتیاوې برابرې کړې.
د یادونې وړ ده، تېره اوونۍ د افغانستان د اوسپنې پټلۍ له لارې ۷۴۰۲۹زره مټریک ټنه انتقالات شوي وو، چې د تېرې اوونۍ په پرتله ۸مټریک ټنه ډېروالی پکې راغلی دی.
افغانستان اوسمهال د اوسپنې پټلۍ له لارې د نړۍ گڼو هېوادونو سره نښلول شوی او د یادې ادارې د معلوماتو پر بنسټ، هڅه کوي چې د هېواد ټول ولایتونه د اوسپنې پټلۍ څخه برخمن کړي.