د بهرنیو چارو وزارت سرپرست مولوي امیر خان متقي د ترکمنستان د وزیرانو شوری مرستیال او د بهرنیو چارو له وزیر رشید مردوف د ویډیويي کنفرانس له لارې خبرې کړي.
د دغه وزارت ویاند حافظ ضیاء احمد تکل په یوه خبرپاڼه کې ویلي، په دغه ویډیویي کنفرانس کې د افغانستان او ترکمنستان پر سیاسي او اقتصادي اړیکو، د ډیپلوماټیکو اړيکو د کچې پر لوړولو او د دواړو هیوادونو ترمنځ د لویو پروژو، په ځانګړې توګه د افغانستان په خاوره کې د ټاپي نلليکې د چارو په اړه تفصیلي خبرې شوې دي.
ښاغلي متقي د دواړو هیوادونو دوه اړخيزې اړيکې تر بل هر وخت پياوړې بللي او د لازیاتو همکاریو او پرمختګونو لپاره یې شرائط مساعد بللي.
بل خوا د ترکمنستان د وزیرانو شوری مرستیال او د بهرنیو چارو وزیر رشید مردوف د ټاپي پروژې روانې چارې مثبتې ارزولي او په نږدې راتلونکي کې یې د رېل پټلۍ، سوداګرۍ او ټرانزيټ برخو کې د عملي همکاریو د پراختیا خبر ورکړی دی.