د افغان حکومت وياند مولوي ذبيح الله مجاهد په خبري کنفرانس کې ويلي، چې د داعش ډلې مشران د پاکستان په خاوره کې دي او په خبره یې پاکستان دې یا افغان حکومت ته دا کسان وسپاري او يا دې له خپلې خاورې وشړي.
د مجاهد په خبره په پاکستان کې د داعش ډلې پراخ شتون سيمې ته ګواښ پېښ کړی او دقيق معلومات ښيي، چې په تهران کې د سردار سلیماني په تلین ترسره شوی برید او په مسکو کې ترسره شوی بریدونه له همدې مراکزو څخه پلان او تنظيم شوي وو.
هغه زياتوي چې، په افغانستان کې په دیني علماء کرامو، امارتي شخصیتونو او عامو خلکو زیات خونړي بریدونه هم په همدې مراکزو کې پلان او له همدې مراکزو څخه تنظیم او ترسره شوي.
مجاهد ويلي، د داعش ډلې بریدګر او تنظیموونکي پاکستان کې له خپلو شته مراکزو څخه افغانستان ته را لیږل شوي وو، چې په دې اړه کافي شواهد او اسناد موجود دي.