د اسرائیلو پخواني لومړي وزیر ایهود باراک، اوسني لومړي وزیر نتنیاهو ته خبرداری ورکړی، چې د حماس بشپړ له منځه وړل ناشوني دي او په غزې تړانګه کې جګړې ته بیا ور ونه ګرځي.
باراک نتنياهو ته په خبرداري کې ویلي، فرض کړئ چې موږ د حماس پر وړاندې جګړه بیا پیل کړه، نو وروستۍ پایله به څه وي؟ موږ پنځه ځله د جبالیا کنټرول ترلاسه کړ خو هلته مو حماس له منځه یو نه ووړ.
ايهود باراک دا څرګندونې له هغې وروسته کوي چې، نتنیاهو د ایال زامیر د پوځ لوی درستیز په توګه له ټاکلو وروسته هیله څرګنده کړې چې د هغه په دوره کې به لویې لاسته راوړنې ولري، چې نه یوازې د اسرائیل وضعیت بلکې د ټول منځني ختیځ څېره به هم بدله کړي.
د دې ترڅنګ د صهيونيستي اسرائیلو دفاع وزیر یسرائیل کاتز ویلي، چې اسرائیل به هېڅکله د داسې فلسطیني دولت جوړېدو ته اجازه ور نه کړي چې د اسرائیل وجود ته ګواښ وي.