په ننګرهار ولایت کې د افغان سرحدي ځواکونو لخوا د نشه یي توکو اووه تنه قاچاق کوونکي د ۷۳ کیلو ګرامه اومو چرسو سره یو ځای نیول شوي.
په ختیځ کې د ۲۰۱ خالد بن ولید “رض” قول اردو څخه په خپره شوې خبرپاڼه کې راغلي، چې یاد اشخاص هغه مهال ونیول شول، چې غوښتل یې ۷۳ کیلو ګرام چرس له فرضي کرښې اخوا واړوي.
په خبر پاڼه کې زیاته شوې ده: ” د سرحدي ځواکونو د کشفي راپورونو پر بنسټ د ننګرهار ولایت د دور بابا ولسوالۍ اړوند زړې خولې ساحه کې فرضي کرښې ته نږدې اوه تنه د نشه یي توکو قاچاق کوونکي د ۷۳ کیلو ګرامه اومو چرسو سره یو ځای نیول شویدي”خبر پاڼه کې زیاته شوې، چې نیول شوي اشخاص او چرس اړوند ادارو ته سپارل شویدي.
دا په داسې حال کې ده، چې څه موده وړاندې په طورخم کې د امنیتي ځواکونو لخوا د څه باندې ۶۸ کیلو ګرامه ګرانبیه ډبرې، چې په بار وړونکو موټرو کې ځای پر ځای شوې وې او له کرښې اخوا اړول کېدې، ونیول شوې او د قاچاق مخنیوی یې وشو.