د سرحدونو، قومونو او قبایلو چارو وزارت وايي، چې د ياد وزارت د وزیر ملا نورالله نوري په مشرۍ د بېلابېلو وزارتونو له مسؤلینو جوړ یو لوړپوړي پلاوي په ننګرهار ولایت کې د علماوو، قومي مشرانو، استادانو او ځوانانو سره غونډه ترسره کړې ده.
ملا نور الله نوري په دغه ناسته کې د ولسونو مېړانه ستايلې او ویلي یې دي، چې د افغانستان عام خلک د نظام اصلي اردو ده، چې تل یې د خپل ایمان په مټ د متجاوزینو ملاوې ماتې کړې دي.
په ورته مهال د ننګرهار قومي مشرانو او مخورو ډاډ ورکړی، چې هېڅکله به چاته اجازه ورنکړي چې د افغانستان ملي یووالي او اسلامي نظام ته زیان ورسوي.
هغوی ټینګار کړی، چې د ولس او نظام ترمنځ واټن نشته او افغانان د خپلې خاورې د دفاع لپاره هر ډول قربانۍ ته چمتو دي.
د غونډې ګډونوالو د پاکستاني رژيم د تېري د غندنې ترڅنګ ويلي، چې ګاونډي هېوادونه باید د افغانانو له صبر او تاریخ څخه عبرت واخلي.
دوی زیاته کړې، چې د ننګرهار غیور ولس د خپل نظام تر څنګ ولاړ دی او د هر ډول بهرنۍ لاسوهنې پر وړاندې به په کلکه ودرېږي.