د ننګرهار ولایت مقام د رسنیو دفتر په یوه خبرپاڼه کې ویلي چې، د دغه ولایت په شيخ مصري صنعتي پارک کې د ۲۸ میلیونه ډالرو په ارزښت د ۴۰ مېګاواټه برېښنا پروژې چارې پیل شوې.
د خبرپاڼې له مخې، په دغه پروژه کې برېښنا شرکت ۸ ميليونه، زولرستان او د ترکيې ۷۷ شرکتونه ۲۰ ميليونه امريکايي ډالر پانګونه کوي، چې برېښنا به د صنعتي پارک فابريکو او کورونو ته ورکړل شي.
په خبرپاڼه کې راغلي چې، دغه پروژه پر ۳۵۰ جریبه ځمکه پلې کېږي او چارې به یې په یو کال او شپږو میاشتو کې بشپړ او ګټې اخستنې ته به وسپارل شي.
په همدې پار جوړو شویو مراسمو کې د برېښنا شرکت عمومي رئيس ډاکتر عبدالباري عمر ويلي، چې اوس مهال هېواد د ۲۵۰ مېګاواټه داخلي برېښنا توليد ظرفيت لري؛ خو په تېرو شپږو مياشتو کې د ۹۰۰ ميګاواټه برېښنا پروژې ډيزاين شوي چې د عملي کېدو په حال کې دي.
د نوموړي په وينا، روانه مياشت د برېښنا پنځه لويې پروژې پرانيستل شوې او تمه ده چې د همدې مياشتې تر پايه به د ۲۲ ميليارده افغانيو په لګښت نورې سترې پروژې هم پيل شي.
ښاغلي عمر زیاته کړې ده، چې د شيخ مصري صنعتي ښارګوټي لپاره به سبسټېشن جوړ او د ازبکستان په همکارۍ به ۲۲۰ ولټ لين دغه پارک ته وغځول شي، چې ورسره به نه يوازې صنعت وده وکړي، بلکې ۴۰ زره کورنيو ته به د برېښنا زمينه هم برابره شي.