د نړیوال بانک اجرائیوي مدیرانو د افغانستان د انعطاف منلو د ټولنې د معشیت پروژې لپاره له اړمنو افغانانو سره د ۸۴ مېلیونه ډالرو مرسته تصویب کړې ده.
یاد بانک ویلي، دا مرسته د افغانستان انعطاف منلو امانتي صندوق (ARTF) د ۷۰ مېلیونو ډالرو تکمیلوونکې اضافي مرسته ده.
د نړیوال بانک له لوري په خپره شوې خبرپاڼه کې د افغانستان د دفتر د مشرې ملیندا گوډ له قوله ویل شوي، دغه مرسته په کلیوالي او ښاري سیمو کې اړمنو کسانو لپاره د بلاعوضه مرستو له لارې د معیشت او خدمتونو او ټولنیزو ادارو د پیاوړتیا د وړاندې کولو لپاره ده.
د گوډ په خبره، دا نوې مرسته به د اقلیم د بدلون د اغېزو له امله د انعطاف منلو د متمرکزو فعالیتونو رامنځ ته کول پراخه کړي او ستنېدونکو افغان کډوالو لپاره به کار زمینه هم برابره کړي.
د نوموړې په خبره، په وروستیو ۱۸ میاشتو کې یې د کارموندنې یو چوکاټ هم چمتو کړی او په نوې مرسته به د افغانستان په ۲۶ ولایتونو کې خپل خدمتونه روان وساتي.
یادې پروژې په ۲۰۲۲ز کال د افغانستان کلیو او ښاري سیمو ته د نړیوال بانک د ۲۶۵ مېلیونه ډالرو په مرسته خپل فعالیت پیل کړی، چې تر دې مهاله یې څه باندې ۷۷۶زره افغان کورنیو ته لنډمهاله دندې پیدا کړي او له دې لارې یې ۵ اعشاریه ۴ مېلیونه کسانو گټه اخیستې ده.
نړیوال بانک ویلي، په همدې موده کې یې ۷ اعشاریه ۴ مېلیونه افغانانو ته ټولنیز خدمتونه لکه سړکونه، روغتیايي مرکزونه او د څښاک اوبه هم برابرې کړې دي.
د نړیوال بانک په اعلامیه کې ویل شوي، په افغانستان کې د بېلابېلو لاملونو له امله د ۲۳ مېلیونه افغانان بشري مرستو ته اړتیا لري.