نړۍوال وجهي صندوق ۱.۳ میلیونه افغان کډوالو له پاره بېړنۍ بودجه تصویب کړه

د ملګرو ملتونو پراختیايي پروګرام ویلي، چې نړۍوال وجهي صندوق د ۱.۳ میلیونه افغان کډوالو له پاره ۴.۷ میلیون ډالر بېړنۍ مرسته تصویب کړه.د یادې ادارې پر وینا یاده بودیجه د هغو کډوالو لپاره ځانګړې او تصویب شوې، چې دا مهال په پاکستان هېواد کې اوسېږي او افغانستان ته راستېدونکي دي.دغه اداره وايي، چې یاده مرسته به د ایډز، نري رنځ او ملاریا ناروغیو سره د مبارزې په برخه کې ولګول شي.یادې ادارې زیاته کړې ده: ” دغه ۴.۷ میلیونه بیړنۍ بودجه به پر ۶۶ میلیونه هغې بودجې ور زیاته شي، چې د ۲۰۲۴ کال د جنوري په لومړۍ نېټه د درې کلونو له پاره اعلان شوې وه، دغه مرسته د ملګرو ملتونو د پراختیايي پروګرام له لوري ورکول کیږي”په افغانستان کې د ملګرو ملتونو د پراختیايي پروګرام مسؤل وایي، لا له وړاندې یې د راستنېدونکو کډوالو بیړنیو اړتیاوو ته د رسېدو له پاره د ملاریا، ایډز او نري رنځ سره مخ کسانو ته د خدمتونو وړاندي کولو چمتوالی نېولی دی.دا په داسې حال کې ده، چې په دې وروستیو کې د پاکستان هېواد څخه کډوال په جبر را ایستل کیږي، خو افغان حکومت ټولو را ستنېدونکو ګډوالو ته د خدماتو په موخه پوره چمتوالی نیولی او د ټولو ګډوالو ستونزو او غوښتنو ته رسېدنه شوې او دا لړۍ لا هم دوام لري.