د کډوالو او بیرته راستنېدونکو چارو وزارت وایي، چې روانه اوونۍ د پاکستان پوځي رژیم له بندخونو ۴۹۱ تنه افغان کډوال ازاد او هېواد ته راستانه شوي.
یاد وزارت د کندهار او ننګرهار د کډوالو او راستنېدونکو چارو ریاستونو له قوله ویلي، چې له دې ډلې ۳۷۹ تنه د تورخم او ۱۱۲ تنه د سپین بولدک له لارې هېواد ته راستانه شوي.
د کډوالو او بیرته راستنېدونکو چارو وزارت د معلوماتو له مخې، یاد کسان د استوګنیزو سندونو د نه لرلو له امله د یاد رژیم په بېلابېلو بندخونو کې ساتل کېدل.
وزارت زیاته کړې، چې یاد افغان کډوال تر ثبت او مرستو ترلاسه کولو وروسته خپلو اصلي سیمو ته لېږدول شوي دي.