د هرات د اطلاعاتو او کلتور رئيس احمد الله متقي په خپله اېکس پاڼه ليکلي، ”د هرات په تاريخي ښار کې د فلسطینیانو په ملاتړ ستره غونډه وشوه.”
احمدالله متقي زیاته کړې، “د هرات ښار زرګونه اوسېدونکو په مرکزي جامع جومات کې د یوې سترې غونډې په ترڅ کې د دکتور اسماعيل هنيه په شهادت د غمرازۍ څرګندولو سربېره پر غزې تړانګې د اسرائیلو وحشت غندلی او د زر تر زره بندېدو غوښتنه یې کړې ده.”
دا په داسې حال کې ده چې څو ورځې وړاندې هم د افغانستان پلازمېنې کابل او ننګرهار ولسونو لخوا د اسمعيل هنيه پر شهادت د غمرازۍ او فلسطين د ملاتړ په موخه ورته غونډې جوړې شوې وي.