کله چې ټرمپ د دوه ویشتم ځل لپاره د بګرام د نیولو ادعا تکرار کړه، د افغانستان سیاسي څېرو په بېلابېلو بڼو غبرګونونه وښودل، دغه بدنامه معاملهګرو او وطن پلورونکو چې د خپل بهرني بادار غږ واورېد، خوشحاله شول او د خلکو د شتمنیو لوټلو هیلې یې بېرته را ژوندۍ شوې. له همدې امله هر یوه ژر خپله اصلي څېره ښکاره کړه. لکه څنګه چې د جنبش ګوند ویاند یوازې څو ساعته وروسته «دوستم» د امریکا د یوازیني همکار په توګه یاد کړ.
امرالله صالح، د زرغون بهیر مشر او د پرځېدلي جمهوریت مرستیال، د ټرمپ د څرګندونو په غبرګون کې وویل: «دا وضعیت په بدلېدو دی او زرغون بهیر به د وروستي تصمیم تر نیولو مخکې دا وضعیت تر څارنې لاندې ولري.» دا خبره ښيي چې هغه هم د معاملې دروازې پرانیستې او که موضوع جدي شي، د معاملې او همکارۍ لپاره چمتو دی.
په همدې وخت کې تمیم عاصي، د دفاع وزارت پخواني مرستیال په یوه عجیبه غبرګون کې وویل: «ټرمپ په خبرو کې جدي دی» او له نړۍوالو ځواکونو سره همکاري یې «خوښونکی خبر» وباله. نورو پخوانيو سیاستوالو هم ورته دریځونه خپل کړل او هغو شرموونکو معاملو ته یې شین چراغ وښوده چې دوی بېرته واک ته رسولی شي.
دغه څرګندونې د هغو رهبرانو لخوا مطرح کېږي چې تل یې ځانونه د آزاد ولس او د اشغال ضد مبارزینو استازي معرفي کړي دي؛ خو نه پوهېږي چې د افغانستان مجاهد ملت هېڅکله د خاورې او وطن د آزادۍ سودا نه ده منلې. افغانانو د خاورې د بشپړتیا او خپلواکۍ لپاره خپل مالونه، ژوند او د خپلوانو وینې قربان کړې او د آزادۍ ونه یې په وینو خړوبه کړې ده.
خو په مقابل کې د اوسني حکومت مشرتابه په زړورتیا او ښکاره دریځ کې وویل: «نه یوازې بګرام، بلکې د افغانستان یوه ذره خاوره هم هېڅکله د معاملې وړ نه ده، امریکا باید له تېر تاریخ نه زده کړه وکړي.» دوی دښمن ته پیغام ورکړ چې څنګه یې په سر، مال او وینو خپلواکي ترلاسه کړې، هماغسې د وطن د ساتنې لپاره هم هر ډول فداکارۍ ته تیار دي او هېڅ خاین او اشغالګر ته به اجازه ور نه کړي چې د دې خاورې د لوټلو فکر وکړي.
پر همدې مهال، د افغانستان ملت هم په حقيقي او مجازي فضا کې توند غبرګونونه وښودل او یادونه یې وکړه چې د اشغال پر وړاندې د مقاومت وینه لا هم په رګونو کې توده ده.
وروسته له دې زړورو غبرګونونو، زلمي خلیلزاد، د امریکا پخواني استازي، د ټرمپ له ادعاوو څخه په شاتګ سره دا څرګنده کړه: «امریکا د بګرام د نیولو لپاره هېڅ پلان نه لري».
دغه خبرې د هغو خاینو او بهرني غلامانو پر هیلو یخې اوبه وبهولې چې واک ته د بېرته رسېدو خوبونه یې لیدل. په دې توګه، هغه نیمژواندې هیلې چې د ټرمپ په لافو راژوندۍ شوې وې، یو ځل بیا له خاورو سره خاورې شوې.
په حقیقت کې، د افغانستان د اوسني حکومت رښتیني او وطنپال مشران او هم د دې هېواد ولس هېڅکله د آزادۍ او خاورې پر سر سودا نه مني. دوی په زړورتیا د هر اشغالګر پر وړاندې ولاړ دي. هغه څه چې ماته خوري، د خاینو او معاملهګرو اشخاصو باطلې هیلې دي؛ هغه هیلې چې هر ځل د یوې سیاسي لافې په اورېدو سره ژوندۍ کېږي، خو ډېر ژر د ولس د عزم په وړاندې ماتېږي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.