د هلمند د کرنې، اوبو لگولو او مالدارۍ ریاست وايي، د دغه ولایت په ناوې ولسوالۍ کې په سلگونه هکټاره ځمکه کې ژمني سابه کرل شوي وو، چې اوسمهال د گل نیونې په حالت کې دي.
له یاد ریاست څخه په خپره شوې خبرپاڼه کې ویل شوي، د یادو سبو حاصلات به ډېر ژر بازار ته وړاندې شي.:«سږکال په ناوې ولسوالی کې په ٢١٢ هکټاره ځمکه کې لېړوگان(بینډۍ)، په ١١١ هکټاره ځمکه کې توربانجان، ١٤٦ هکټاره ځمکه کې رومیان او ١٨ هکټاره ځمکه کې ماروکدو کرل شوي دي.»
د یو بل خبر له مخې، د هلمند ناوې ولسوالۍ کې د کرنې د مسلکي کارکوونکو له لوري د غنمو د کفشک حشرې او نورو نباتي ناروغیو او افاتو میخانیکي مخنیوي کمپاین پیل شوی دی، چې په ترڅ کې به یې زرگونه هکټاره د غنمو کروندې له یادې حشرې څخه پاکې شوې.
«د غنمو د وږي په مرحله کې د كفشك حشره د غنمو له شيرې، پاڼو، تنې او دانې څخه تغذيه كوي او پر همدې وخت دا حشره د غنمو دانو ته زهري مواد داخلوي، چې له مخې یې د غنمو کیفیت او کمیت خرابېږي. د هلمند گڼو ولسوالیو ته مسلکي کسان ولېږل شي، چې تر د یو شمېر نباتي ناروغیو او افتونو نمونې به له ولسوالیو څخه مرکز لښکرگاه ته راوړي او دلته به ورباندې لابراتواري ازموینې وشي. ناروغۍ او افتونه یې تشخیص او په مقابل کې به یې کروندهگرو ته لازمې سپارښتنې او عملي روزنې ورکړل شي.»