د اطلاعاتو او کلتور وزارت د خپرونو چارو معین مولوي مهاجر فراهي وایي، چې د سرپرست حکومت د مشرتابه لخوا پر هغو کتابونو چې د هېواد دننه چاپېږي، مالیه په بشپړه توګه معاف شوه.
ښاغلي مهاجر پر خپله اېکس پاڼه لیکلي، چې پر دې سربېره پر هغو کتابونو چې له بهر واردېږي، هم مالیه ۵۰ سلنه راکمه شوې ده.
د نوموړي په خبره له دې پرېکړې څخه څرګندېږي چې د افغانستان سرپرست حکومت د کتابونو د چاپ او ناشرانو پوره ملاتړ کوي او د دوی د ستونزو د حل لپاره ځانګړې طرحې لري.