امریکایي واشنګټن پوسټ ورځپاڼې په کابل کې د طالب سرتیرو د بوختیاوو او هیلو په اړه یو مطلب خپور کړی دی.ورځپاڼه وایي، یو شمېر طالبان د اوونۍ پای د ښار په پارکونو کې تېروي. ځینې په لویو سکرینونو د کرکټ لوبې ګوري. نور شمېر یې په فیسبوک کې سیلفي تصویرونه خپروي او یا په لویدیځ کې لیکل شوي د ځان جوړونې کتابونه لولي.دغه راز، یو شمېر نور طالبان د انګلیسي په زدکړه بوخت دي.پنځوس کلن عبدالرحمن رحماني چې د امارت په تېره دوره کې یې د کابل په نیولو کې ونډه درلوده وایي، هیله لرم چې کابل به یوه ورځ له دوبۍ سره برابر وي.دوبۍ د متحده عربي اماراتو ستر سوداګریز ښار دی.رحماني واشنګټن پوسټ ته ویلي، کله چې افغانستان کې اقتصادي ستونزې حل شي، نو لوی بدلون به راشي.ورځپاڼې ته یو شمېر مجاهدینو ویلي چې د ښار په پرتله یې کلیوالي ژوند خوښیږي، خو په لرو پرتو سیمو کې د بریښنا نه موجودیت او نورو ستونزو هلته ژوند سخت کړی دی.ځینې مجاهدین هیله لري چې په کلیو کې به دغه ستونزې حل او عصري اسانتیاوې به رامنځته شي.
واشنګټن پوسټ: طالبان هیله مند دي چې کابل به یوه ورځ له دوبۍ سره برابر وي
#image_title