د ټولگټو وزارت وايي، د هېواد گڼ شمېر لویې لارې د وروستیو ورښتونو او سېلابونو له امله د لنډ مهاله لپاره د ترافیکو پرمخ تړل شوې وې، چې اوس یې د پاکولو چارې سر ته رسېدلي دي.
له یاد وزرات څخه په خپره شوې خبرپاڼه کې ویل شوي، د نورستان – کونړ عمومي سړک چې د تېرو ورځو دوامدواره ورښتونو او غر ښویېدنې له امله تړل شوی و د یاد ولایت د ټولگټو ریاست د کاري پرسونل له لوري پاک کاري او ترافیکو پر مخ پرانیستل شو خو په همدې ولایت کې د کامدېش ۔ برگمټال ، مندول ۔ دواب او وایگل ولسوالیو لارې د غره ښویېدنې له امله لا هم د ترافیکو پرمخ تړلي دي، چې د یاد ولایت د ټولگټو ریاست کاري پرسونل له لوري یې د پرانیستلو هڅې روانې دي.: «همدارنگه د بدخشان ولایت د فیض آباد – بهارک مسیر، په تخار ولایت کې د تخار – بدخشان لویه لار او د فرخار – ورسج عمومي سړک د وروستیو سېلابونو له امله د ترافیکو پر مخ تړلي و چې د اړوندو ولایتي ریاستونو د کاري پرسونل له لوري پاک کاري او د ترافیکو پرمخ پرانیستل شو.»
د خبرپاڼې له مخې، دغه راز په پکتیکا کې د سرحوضې – ارگون مسیر د غر ښویېدنې له امله، د کابل جلال آباد لویې لارې اړوند د لغمان ولایت په سرخکان سیمه کې د سېلابونو په پایله کې د محافظتي دېوالونو د تخریب له امله او د زابل د میزانې ولسوالۍ پر مسیر د تخریب شوي پلگوټي له امله ترافیکې ستونزې رامنځته شوې وې، چې د اړوندو ولایتي ریاستونو د کاري پرسونل لوري پاک کاري او یادې ترافیکي ستونزې هوارې شوې.
د وروستیو ورښتونو او سېلابونو له امله د هېواد گڼې لویې لارې د لنډمهاله لپاره د ترافکیو پرمخ تړل شوې وې، چې د ټولگټو وزارت له لوري خینې لارې پاکې شوې او د ځینو د پاکولو کارونه روان دي.