پاکستانۍ رسنۍ وايي، بېگاه شپه پر ځايي وخت درې بجې د پاکستان د پوځ دوو جېټ الوتکو د پکتیکا برمل ولسوالۍ په درېیو کلیو بمبار کړی دی.
پاکستانۍ رسنیو لیکلي، بمبار د تحریک طالبان پاکستان د یوه قومندان عبدالله شاه په کور شوی؛ خو دا چې په دغه برید کې مرگژوبله اوښتې او کهنه په دې اړه څه نه دي ویل شوي.
په یو بل خبر کې ویل شوي، پاکستاني پوځ د کونړ ولایت د شولتن درې پر چوگان کلي هم بمباري کړې ده؛ خو د اوښتې مرگژوبلې په اړه څه نه دي ویل شوي.
د خوست ولایت په ځینو سیمو هم بېگاه شپه پاکستاني پوځ بمبار کړی دی، خو هلته هم د اوښتې مرگژوبلې په اړه څه نه دي ویل شوي.
د تحریک طالبان پاکستان ویاند محمد خراساني ویلي، بمباري د هغو وزیرستاني کډوالو په کورونو شوې، چې د پاکستان د پوځ د عملیاتو له امله له ډیورنډ فرضي کرښې افغانستان ته اوښتي وو.
نوموړي ویلي، د پاکستان په بمبارۍ کې د تحریک طالبان پاکستان کوم غړی وژل شوی نه دی، بلکې قومندان عبدالله شاه اوسمهال په پاکستان کې جنگېږي.
پاکستان د خوست او پکتیکا په هغو ولسوالیو بمباري کړې، چې له شمالي وزیرستان او سوېلي وزیرستان سره گډه پوله لري.په ۲۰۲۲ز کال هم پاکستان د خوست او کونړ ولایتونو په ځینو سیمو بمباري کړې وه، چې ۲۰ ماشومان پکې وژل شوي وو.
پاکستان تل ادعا کړې چې د تحریک طالبان پاکستان غړي په افغانستان کې پټنځایونه لري، خو افغان حکومت د پاکستان دغه ادعاوې رد کړي دي.
په پکتیکا او خوست ولایتونو د پاکستان بېگاني بمبار ته اسلامي امارت توند غبرگون ښودلی دی.
د افغان حکومت د ویاند ذبیح الله مجاهد له لوري رسنیو ته په لېږل شوې خبرپاڼه کې ویل شوي، دغه ډول بریدونه به بدې پایلې ولري.: «تیره شپه شاوخوا ۳ بجې پاکستانیو الوتکو د پکتیکا ولایت برمل ولسوالۍ په لمنه سیمه کې او د خوست ولایت سپیرې ولسوالۍ په افغان دوبۍ سیمه کې د عامو وګړو په کورونو باندې بمبار کړی، چې په پکتیکا کې ۶ تنه ۳ ښځینه او ۳ ماشومان شهیدان شوي او یو کور نړیدلی او په خوست ولایت کې یو کور نړیدلی ۲ تنه ښځینه شهیدانې شوي دي.
د عبدالله شاه په نامه کس چې پاکستانی اړخ یې په پيښه کې د په نښه کیدو ادعا کوي هغه په پاکستان کې دی، بله داچې په یاده سیمه کې په دواړو غاړو کې یو قوم اوسیږي چې ورځنی تګ راتګ او ګنې خپلویانې لري.»
د خبرپاڼې له مخې، د ا.ا.ا. یاد بريدونه په کلکو ټکو غندي او دغه غيرسنجيده اقدام د افغانستان په حریم تجاوز او تیری بولي. د افغانستان اسلامي امارت، چې د نړۍ د زبرځواکونو پرخلاف د ازادۍ د اوږدې مبارزې تجربه لري، هیچاته پخپله خاوره د تیري اجازه نه ورکوي.:«پاکستانی ولس او نوی ملکي حکومت باید پرېنږدې چې د پوځ څو تنه جنرالان په دغه ډول بې باکه کړنو سره د تېرو شلو کلونو په څیر د نورو جهتونو د گټو لپاره خپلو غلطو سیاستونوته دوام ورکړي او د دوو مسلمانو ګاونډیو هیوادونو اړیکې خرابه کړي.
پاکستان باید پخپله خاوره کې د پيښو د نه کنترول، ناتواني او ستونزو پړه پر افغانستان وانهچوي ځکه داسې پيښې خورا بدې پایلې درلودلی شي چې بیا به یې کابو کول د پاکستان په اختیار کې نه وي.
د افغانستان اسلامي امارت هیچاته اجازه نه ورکوي چې د افغانستان له خاورې څخه په استفاده د چا امنیت خراب کړي.»