یو شمېر رسنیو د پاکستاني پولیسو له قوله خبر ورکړی، چې په جنوبي وزیرستان کې بې پیلوټه الوتکې توغندیز برید کړی او څلور تنه یې وژلې دي.
پولیس وایي، برید په یو کور ترسره شوی چې په وژل شویو کې ماشومان هم شامل دي.
په سیمه کې د پولیسو مشر هدایت الله ویلي، چې د بې پیلوټه الوتکې برید د جنوبي وزیرستان په ولسوالۍ کې شوی، خو لا معلومه نه ده، چې دا برید چا کړی.
نوموړي زیاته کړې، چې د پیښې په اړه یې پلټنې پیل کړې دي.بل لور ته د سیمې اوسیدونکو ویلي، چې د توغندي په برید کې وژل شوي عام خلک و او هیڅ کومې وسله والې ډلې سره یې تړاو نه درلود.
د سیمې اوسېدونکو مړي د پاکستان د پوځ یو کمپ مخې ته د اعتراض په توګه ایښي او هوډ یې څرګند کړی، تر څو مالومه نشي دا برید چا کړی، خپل مړي به خښ نه کړي.
د پاکستان حکومت او پوځ تر اوسه د دې برید په هکله څه نه دي ویلي، خو تر دې وړاندې په دې سیمه کې دا ډول بریدونه امریکا او یا د پاکستان پوځ کول.
ځایي خلک وايي، دوی د شپې ناوخته د درنې چاودنې غږ اورېدلی او هغه مهال په هوا کې بې پیلوټه الوتکه هم لېدل شوې ده.
د دوی په وینا، چاودنه کې د سیمې اوسېدونکی بنات مسید د هغه میرمن، یوه لور او تنکی زوی وژل شوي او ۱۴ کلنه لور یې ټپي شوې، چې د درملنې له پاره پوځي روغتون ته وړل شوې ده.
اخوا بیا رسنۍ د پاکستان د بلوچستان ایالت اړوند “ژوب” سیمه کې د یوه پاکستاني افسر د وژل کېدو او څو تنو نورو سرتیرو د ټپي کېدو خبر ورکړی دی.په خبر کې ویل شوي، چې دغه افسر وسله والو سره په جګړه کې وژل شوی دی.