د نيمروز ولایت سیمهییز مسوولین وايي، په بشپړ ډول پر بهرنیو اسعارو د راکړې ورکړې مخنیوي په موخه هڅې روانې دي او په وينا یې د پخوا په پرتله په نیمروز کې پر بهرنیو اسعارو راکړه ورکړه اتیا سلنه را کمه شوې ده.
د نیمروز د والي د دفتر رییس، حامد ابراهیم رسنيو ته وېلي: د ښاري نظم کمېټې له جوړېدو وروسته په نیمروز کې په بهرنیو اسعارو راکړه ورکړه او سوداګري ۸۰ سلنه کمه شوې ده.
ښاغلی حامد زياتوي چې موږ هڅه کوو چې په راتلونکو څو میاشتو کې په نيمروز کې د تومان راکړه ورکړه او سوداګري صفر ته راورسوو. او په وينا یې له نميروز نه هېواد ته د داخلېدونکو کسانو لپاره دورېښمو په سرحدي سيمه کې د پيسو د تبادلې غرفې جوړې کړې دي ترڅو هر څوک چې هیواد ته ننوځي وکولی شي خپلې پیسې تبادله کړي.
په همدې حال کې د نیمروز اوسېدونکي وايي، وخت ناوخت له بهرنيو اسعارو په استفادې د سوداګریزې راکړې ورکړې پرمهال دوی زیانمن شوي دي او هيله څرګندوي چې ټول هټيوال، سوداګر، او عام خلک د راکړې ورکړې پر مهال خپلې افغاني پيسې وکاروي.
همدا رنګه دوی وايي افغانۍ د افغانانو ملي هويت دی او له دولت غواړي چې د افغانيو د کارونې او د بهرنيو اسعارو د مخنيوي په برخه کې لازم او کوټلي ګامونه واخلي تر څو ټول هېواد او په ځانګړي ډول سرحدي ولايتونه د بهرنيو اسعارو له کارونې پاک شي.
نیمروز یو له هغه ولایتونو دی چې له ایران سره ګډه پوله لري او په تېرو شلو کلونو کې د دغه ولایت ډېری اوسېدونکو پېر او پلور پر ايراني تومان کاوه.