د نړۍ په هر هېواد کې، داسې ډلې او کسان شتون لري چې د هماغه هېواد د ملي ګټو خلاف وي او تر پښو یې لاندې کوي. په افغانستان کې هم د شر او فساد ډله، چې د افغان ملت له دښمنانو سره یې لاس یو کړی، هڅه کوي چې په سیاسي میدانونو کې د ځان لپاره ځای پیدا او د ملي ګټو په قربانولو ورته ورسېږي.
دغه بد کرداره ډله نه یواځې د افغانستان ملي ګټې د خپلو شخصي موخو لپاره قرباني کوي، بلکې په ښکاره او علني توګه د دې خاورې د دښمنانو هر اړخیزه مرسته او چوپړ کوي.
یو له هغو مخربو او ناولو کړنو څخه چې په دې وروستیو کې د شر او فساد ډلې ترسره کړ او افغان ملت سخته وغنده، د ډیورنډ کرښې په رسمیت پېژندل دي. دغه ګام نه تنها د هغو پولو منل دي چې د انګرېزانو لخوا پر افغانستان ورتپل شوې، بلکې د افغانانو له ملي موخو او آرمانونو سره خیانت او د دې ډلې د غلامۍ وروستۍ کچه څرګندوي.
ډیورنډ چې د یوې تحمیلي فرضي کرښې په توګه پېژندل کېوي، افغانانو هیڅکله د رسمي سرحد په توګه نه ده منلې، ځکه چې دغه تپل شوې کرښه نه تنها دا چې له تاریخي اړخه مشروعیت نلري، بلکې په دوامداره توګه یې په رسمیت پېژندنه د افغان ملت لخوا رد شوې ده.
په دې سره د شر او فساد ډلې دا وښوده، چې په حقیقت کې د افغان ملت د ګټو په برخه کې هیڅ د مسؤلیت احساس نه لري او یواځې د خپلو شخصي ګټو په لټه کې دي، همدا چاره او غلام تفکر د دې ډلې د بدنامۍ له لاملونو څخه دي.
یو بل د شرم وړ او بدنام کار چې په دې وروستیو کې د شر او فساد ډلې له لاسونو ختلی او افغانانو په سختۍ سره غندلی دی، د هېواد پر ورزشکارو ځوانانو برید دی. دې ډلې نه تنها د هېواد د ورزشکارانو له ملاتړ او هڅونې څخه مخ اړولی، بلکې په سختو او له سپکاوي ډکو الفاظو یې د هېواد پر ملي ورزشکارانو لفظي برید کړی. ښکاره ده چې دا ډول کړنې یوازې له هېواد پلورونکو او خاینانو سره ښایي.
افغان ملت باید په دې پوه شي چې دغه مزدوران او غلامان هیڅکله د افغانستان پرمختګ ته مخه نه ورکوي، د هر هغه چا په وړاندې چې د هېواد ګټو ته ژمن وي، که ورزشکار وي که حکومتي چارواکي یا بل هر څوک؛ لاس په کار کېږي.
امید دی چې ټول افغانان په دې پوه شوي وي چې له سرپرست حکومت سره د شر او فساد ډلې دښمني د طالبانو له لورې د افغانستان د آبادۍ په موخه، کېدونکو کوښښونو ته له غبرګون پرته بل څه نه دي.
د شر او فساد ډله د دې پر ځای چې د ځوان نسل ملاتړ وکړي، لفظي برید ورباندې کوي، د بې بنسټه او سپکو خبرو په توسط لفظي جګړه ورسره کوي، دا څرګندوي چې دغه ډله او مزدوران یې له کوم ځایه روزل شوي دي، د کوم جهت لپاره کار کوي او د کومو هېوادونو لخوا تمویلېږي!
یو مشهور فارسی متل دی چې وایي، “آن که نان دهد فرمان دهد”؛ دوی ته چې ډوډۍ پاکستان، فرانسه او تاجکستان ورکوي، له شک پرته چې امر او فرمان به هم د افغانستان د دښمنانو په ګټه وي او دغه مزدوران به د مسلمان ملت د دښمنانو په لاره کې لا نور هم کارول کېږي.
د شر او فساد ډلې د رسمي سرحد په توګه د ډیورنډ کرښې په منلو او د افغان ورزشکارانو په تخریب سره، پر خپل وراسته تابوت وروستی مېخ هم وواهه. له دې وروسته به هېڅ ریښتینی افغان په دغه مزدوره ډله دوکه نشي، د دې مزدورانو هویت او اصالت، افغان ملت او ټولې نړۍ ته څرګند او ثابت شو چې دوی د خپلو شخصي ګټو لپاره خپله خاوره او هویت هم په بازار کې پلوري.
نړۍ باید پوهه شي چې د شر او فساد ډله هیڅکله د افغانانو د ګټو استازیتوب او دفاع نشي کولای. افغان ملت به د سرپرست حکومت تر بیرغ لاندې په اتحاد او یووالي سره د هېواد راتلونکې روښانه کړي، ځکه چې طالبانو هېڅکله د افغانستان ملي او د مسلمان ملت ګټې د خپلو شخصي ګټو لپاره نه دي قربان کړي، د دې خاورې د هر متر لپاره تر خپلو ځانونو هم تېرېږي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.