د هرات د اطلاعاتو او کلتور ریاست مسوولین وايي، په دغه ولایت کې ۵۰۰ قلمه تاریخي اثار کشف او راټول شوي دي.
د هرات د موزیم او ارشیف مدیر عبدالجبار نورزی وايي، په تېرو دوو کلونو کې ۲۱۵ قلمه تاریخي اثار د یاد ریاست له لوري کشف او موزیم ته سپارل شوي، همدارنگه ۳۰۰ قلمه تاریخي اثار چې تاریخي مخینه هم لري د خلکو له لوري د هرات موزیم ته د ډالۍ په توگه ورکړل شوي دي.
د یادونې وړ ده، چې د هرات ولایت موزیم او ارشیف په اختیار الدین کلا (ارگ) کې موقعیت لري او سل کاله مخکې یې پرانیستنه شوې ده، چې په هغه وخت کې د دخولي ټکټ بیه یو پول وو او د عجایب خانه په نوم یادېده.
په تېرو څلوېښت کلونو کې د افغان گڼ تاریخي اثار قاچاق او په کمه بیه وپلورل شول، چې اوس د نړۍ په بېلابېلو موزیمونو کې د افغانستان اثار هم اېښې دي.
د اطلاعاتو او کلتور وزارت د معلوماتو پر بنسټ، د هېواد په ټولو بندرونو کې د گڼو تاریخي اثارو د قاچاق مخه نیول شوې ده.