د مخابراتو او معلوماتي ټکنالوژۍ وزارت وايي، د لومړي ځل لپاره د زابل ولایت په سیوري ولسوالۍ کې 4G انټرنېټي خدمتونه پیل شول.
له یاد وزارت څخه په خپره شوې خبرپاڼه کې ویل شوي، د زابل د مخابراتو او معلوماتي ټکنالوژۍ ریاست او د افغان بیسیم مخابراتي شرکت په گډو هڅو د دغه ولایت په سیوري ولسوالۍ کې د افغان بیسیم مخابراتي شرکت له لوري د 4G انټرنېټي خدمتونه په لومړي ځل پیل شول.: «د افغان بیسیم مخابراتي شبکې د 4G مخابراتي او انټرنېټي خدمتونو په فعالېدو سره د یادې ولسوالۍ اوسېدونکي کولی شي لوړ کیفیت او چټک انټرنېټي خدمتونو ته لاسرسی ولري او خپلې مخابراتي ستونزې هوارې کړي.»
د یادونې وړ ده چې 4G انټرنټي خدمتونه د زابل ولايت په مرکز کلات ښار کې د افغان بېسيم مخابراتي شرکت او په شاه جوى ولسوالۍ کې د روشن او اتصالات مخابراتي شرکتونو له لوري وار دمخه فعال شوي وو او عملاً خدمتونه وړاندې کوي.
که څه هم له تېرو دوو کلونو راهیسې په هېواد کې بشپړ امنیت دی او د زورواکو له لوري باج اخیستنې پای ته رسېدلې؛ خو په هېواد کې لا هم د خصوصي مخابراتي شبکو له لوري غږیزې او انټرنېټي بیې کمې شوي نه دي.
د مخابراتو وزارت او د اترا ادارې په څو ځلې ویلي، چې ډېر ژر به د انټرنېټ او غږیزو بیو کې کموالی راشي، خو تر دې مهاله د پاموړ بدلون نه دی راغلی.افغانستان لا هم د نړۍ د هغو هېوادونو په سر کې دی، چې مخابراتي او انټرنېټي خدمتونه پکې په ډېره لوړه بیه وړاندې کېږي.