د افغانستان بانک مسوولین وايي، د دغه بانک له لوري په شمال زون کې (۱،۰۷۳،۹۶۲،۰۰۰) یو مېلیارد، درې اویا مېلیونه، نهه سوه او دوه شپېته زره افغانیو په ارزښت مندرس بانکنوټونه چې د شمال او شمال ختیځ زونونو څخه را ټول شوي وو او د افغانۍ (۱۰۰۰،۵۰۰،۱۰۰،۵۰،۲۰،۱۰،۲) نوعې پکې شاملې وې د ټاکل شوي پلاوي په شتون کې تر کره شمېرنې وروسته وسوځول شول.
له یاد بانک څخه په خپره شوې خبرپاڼه کې ویل شوي، زاړه بانکنوټونه د یوې کړنلارې له مخې راټولېږي او له گردښت څخه ایستل کېږي.
د افغانستان بانک دویم مرستیال محمد اخوند ویلي، د افغانستان بانک له لوري مندرس بانکنوټونه د یو معلوم طرزالعمل په اساس را ټولېږي او له گردښت څخه ایستل کېږي.: «د بانکنوټونو ساتنې ته نه پاملرنه د دې سبب شوې ده چې بانکنوټونه له وخت وړاندې مندرس او له کاره ولوېږي، خلک دې د سوداگریزو راکړو ورکړو پر مهال د بانکنوټونو ساتنې ته پوره پاملرنه وکړي، ترڅو له وخت وړاندې مندرس نه شي.»
د یادؤنې وړ ده، چې راټول شوي له کاره لوېدلي مندرس بانکنوټونه د عدلیې او مالیې وزارتونو، اړوندو ادارو او د افغانستان بانک د بېلابېلو آمریتونو د استازو په شتون کې د گمارل شوي پلاوي له خوا تر بارولو وروسته د بلخ ولایت په بلخ ولسوالۍ کې ځانگړې کرې ته انتقال او وسوځول شول.
د افغانستان بانک له لوري نږدې هره میاشت تر مېلیارد پورته زاړه بانکنوټونه سوځول کېږي؛ د یاد بانک مسوولین له خلکو غواړي چې خپل بانکنوټونه په جېبي بټوو کې وساتي، څو له ژر خرابېدو یې مخنیوی شوی وي.