پوهنې وزارت د یو لړ مراسمو په ترڅ کې د ۱۴۰۳ لمریز کال د کانکور آزموینې ۲۰ تنه ممتاز زده کوونکي وستایل
د پوهنې وزارت له لوري په خپره شوې خبر پاڼه کې راغلي چې: پوهنې وزارت په يو لړ مراسمو کې چې پکې د پوهنې وزارت سرپرست، مولوي حبیب الله آغا، د یاد وزارت رهبرۍ، د چارو ادارې لوی رئیس شیخ نورالحق انور، علماء کرامو او یو شمېر نورو مېلمنو ګډون درلود، د ۱۴۰۳لمریز کال د کانکور آزموینې ۲۰ تنه مخکښ زده کوونکي او ط الب العلمان وستایل.
خبر پاڼه زياتوي چې: د یادو مراسمو په پیل کې د پوهنې وزارت سرپرست ، د ټولنې په پرمختګ او سمون کې علم او پوهه مهمه وبلله، او ویې ویل، چې دیني علوم زموږ د ټولنې اساسي هدف دی او همدارنګه عصري علوم زموږ د ټولنې ضرورت دی؛ موږ متعهد یو، تر څو د دواړو علومو په رڼا کې هېواد د ترقۍ او پرمختګ په لور سوق کړو.
همدا رنګه په خبرپاڼه کې راغلي چې: ښاغلي مولوي حبيب الله اغا د کانکور ممتاز زده کوونکي د ټولنې بااستعداده اشخاص وبلل او هغوی ته یې د خپلې خوښې پوهنځیو ته د لار موندلو له امله مبارکي وویله.
خبرپاڼه وايي چې: ورپسې د چارو ادارې لوی رئيس هم يادو زده کوونکو ته د کانکور په آزموينه کې د برياليتوب مبارکي وويله او ويې ويل: د هېواد په آبادۍ او رغونه کې ستاسو په شان د پوهو ځوانانو ونډه د پام وړ ده او ستاسو مسئولیت دی، چې په راتلونکي کې خلکو او هېواد ته په صادقانه توګه خدمت وکړئ.
په پای کې د کانکور مخکښ زده کوونکي د پوهنې وزارت د سرپرست او نورو مسئولینو له خوا په ستاینلیکونو او ډالیو وستايل شول.
د سږ ۱۴۰۳ کال کانکور ازموینې ممتازه زده کوونکي تر دې وړاندې د ازموينې ملي ادارې او ځينو نورو حکومتي مسولينو او عامو خلکو له لوري هم په پراخه کچه وستايل شول.