د اوبو او انرژۍ وزارت له لوري په خپره شوې خبرپاڼه کې راغلي چې د اوبو او انرژۍ وزارت وزير ملا عبدالطيف منصور د یوه چینایي شرکت مسؤلینو سره په کنړ ولایت کې د برېښنا د تولید په دریو سترو بندونو باندې د پانګونې په اړه ناسته کړې ده خپره شوې اعلاميه زياتوي چې: د اوبو او انرژۍ سرپرست وزیر محترم الحاج ملا عبداللطیف منصور د خپل کار په دفتر کې د یوه چینایي شرکت له مسؤلینو سره وکتل او په کنړ ولایت کې د دریو سترو بندونو ( شال، ساګي او سرتاق) د برېښنا د تولید په پروژو کې د پانګونې په هکله یې بحث وکړ.
په اعلاميه کې همدا رنګه راغلي چې: په دغه لیدنه کې، د چینایي شرکت مسؤلینو په نوموړو پروژو کې د پانګونې لپاره لېوالتیا څرګنده کړه او زیاته یې کړه، چې چمتو یو چې ډېر ژر له دغه وزارت سره د همکارۍ هوکړه لیک لاسلیک کړو او په عملي توګه خپلې چارې پیل کړو.
اعلاميه زياتوي: په ورته مهال، د اوبو او انرژۍ سرپرست وزیر د برېښنا د تولید په بندونو کې د نوموړي شرکت د پانګونې د لېوالتیا هرکلی وکړ او یادونه يې وکړه، چې د کنړ سیند په اوبو کې د برېښنا د تولید لپاره په کافي توګه وړتیا شتون لري که چیرې په راتلونکي کې ټول دغه بندونه جوړ شي، نو افغانستان ان کولای شي چې ټولو ګاونډیو هېوادونو ته برېښنا صادره کړي.
د اوبو او انرژۍ سرپرست وزیر د نوموړي شرکت مسؤلینو ته د دغه وزارت د همکارۍ په برخه کې د پانګونې لپاره د زمینې د چمتو کولو ډاډ ورکړ او ټینګار یې وکړ، چې غوره ده چې عملي چارې یې ډېر ژر پیل شي.
دا په داسې حال کې ده چې په وروستيو څو کلونو کې د هېواد د اوبو د مهارولو او بندونو جوړولو ته په لوړه کچه پاملرنه شوې او تمه کېږي چې افغانستان به ډېر ژر د برېښنا د تولید په برخه کې د برېښنا بندونو جوړولو په مټ په ځان بسيا شي.