د افغانستان د اوبو او انرژۍ وزارت وايي، د دغه وزارت او چین د تویار صنعتي شرکت تخنیکي ډلو له پنجشېر سیند څخه کابل ته د اوبو د لېږد پروژې مسیر څخه د لیدنې او اروزنې په موخه یاد ولایت ته سفر کړی و.
له یاد وزارت څخه په خپره شوې خبرپاڼه کې ویل شوي، تخنیکي ډلو د دغه سفر پر مهال د پورتني پنجشېر (بازارک) سیندیزې فرعي حوزې رئیس فضل الله عادل، د پنجشېر له والي محمد آغا حکیم سره کتلي او له پنجشېر سیند څخه کابل ته د اوبو لېږد پروژې په هکله یې بحث او د اندونو تبادله کړې.
د خبرپاڼې له مخې، د پنجشېر والي تخنیکي ډلو ته له پنجشېر څخه کابل ته د اوبو لېږد پروژې او د پنجشېر په کچه د نورو پروژو د پلي کولو په برخه کې د هر راز همکارۍ ډاډ ورکړی دی.
په دغه لیدنه کې د پنجشیر والي نوموړو تخنیکي ټیمونو ته له پنجشیر سیند څخه کابل ته د اوبو لیږد پروژې او د پنجشیر ولایت په کچه د نورو پروژو د پلي کولو په برخه کې د هر راز همکاري ډاډ ورکړ.
د پنجشېر له سيند څخه کابل ته د اوبو د لېږد پروژه ١٢٠ کيلومتره اوږدوالی ولري، چې د پنجشېر له مرکز بازارک څخه پيل او د کابل په تره خېلو سيمه کې پای ته رسېږي.
د اوبو او انرژۍ وزارت د معلوماتو له مخې، د پنجشېر له سینده کابل ته د اوبو لېږد شاوخوا ۱۷۰ مېلیونه ډالره لگښت لري، چې د دغه وزارت له بودیجې ورکول کېږي، چې د دې پروژې په پلي کېدو سره به په کابل کې د څښاک د اوبو د کمښت ستونزه هواره شي.
اوسمهال په کابل ښار کې شاوخوا ۸۰ د څښاک اوبو رسونې خصوصي شرکتونه فعالیت کوي، چې نږدې ۶۰۰ زرو کسانو ته د څښاک اوبه رسوي.
د شمېرو له مخې، ۴.۵ ېیلیونه خلک په کابل ښار کې د اوبو رسونې خدماتو ته لاسرسی نه لري او یوازې یو نیم مېلیون ښاریانو ته دغه خدمات وړاندې کېږي.
د اوبو او انرژۍ وزارت د مسوولینو په خبره، کابل ته د پنجشېر سیند د اوبو د لېږد پروژه له نن ۱۲ کاله وړاندې طرحه او وړاندیز شوې وه، چې د آسیا پرمختیايي بانک له لوري یې مالي ملاتړ کېده.
خو اوسمهال د دغه پروژې په گډون ډېری زیربنايي پروژې د بهرنیو ډونرانو له لوري نه تمویلېږي.
ټاکل شوې چې د دغه پروژې په واسطه به په کلني ډول له پنجشیر سیند څخه سل میلیون متر مکعب اوبه کابل ښار ته انتقال شي او له دغو اوبو به د کابل ښار په یوولسمه، اتلسمه، پنځلسمه، نولسمه او یوویشتمه ناحیو کې شاوخوا خلکو د څښاک لپاره استفاده وکړي.