لیکوال: انجینر عبدالرحمن
د ځینو هغه خلکو او رسنیو له لوري په پراخه کچه تبلیغات روان دي چې له طالبانو سره سیاسي عقده او مشکل لري چې ګواکې له افغانستان څخه خلک په وتلو دي او یو وخت به داسي وي چې صرف طالبان به په هېواد کې پاتې وي.
مونږ دلته ځینې ټکو ته اشاره کوو:
په کابل د طالبانو د واکمنېدو په لومړیو میاشتو کې دا یقیني حقیقت ؤ چې د هیواد څخه ځینې خلکو د وتلو هڅه کوله، ځینې له هیواده ووتل او ځینو د حالاتو په درک کولو سره بیرته هیواد ته راستانه شول هغه هم د طالبانو مشکل نه ؤ چې ځینې خلک له هیواد څخه د وتلو هڅه وکړه، بلکې دلته رسنیو او سازمانونو طالب دومره بد معریفي کړی ؤ چې بیرته دوی هم په ویره او ترس کې ؤ.
یوه قیصه ده چې کوم لیونی ماشومانو پسې اخيستې ؤ بیا دا لیوني ورته ویلي وو چې هغه کوز کلي کې واده دی نو ټولو ماشومانو منډې کړې، وروسته لیوني هم منډه کړه چې ګواکې رښتیا به واده وي، نو دې خلکو د طالب پر وړاندې دومره تبلیغات وکړل چې تر هر چا مخکې همدغه خلکو منډې وهلې چې کومو له دغه سازمانونو سره کار کاوه او دلته یې بده سابقه درلوده.
په هر حال، څو میاشتې مخکې یو ملګري را څخه وغوښتل چې په کابل کې ورته کور پیدا کړم، د څو میاشتو سختو پلټنو وروسته مو یو کور په لوړ قیمت په کرایه ونیوه.
همدارنګه اوس هم د یوې میاشتې راهیسي د کور په پلټنه مصروف یم پرون د کارت۳ په ساحه کې یو رهنما ولا د خبرو په جریان کې راته وویل: «د څو کالونو راهیسې په دغه کار بوخت یم خو دا دوه کالونه کورونه اول پیدا کیږي نه چې پیدا شي قیمت یې ډیر لوړ وي، سحر چې کور خالي شي ماځیګر بل کس نیولی وي، ان د جمهوریت وخت کې هم کورونو کرایې او بیعې دومره نه وې لوړې شوې».
البته معلومه خبره ده چې د هېوادوالو مالونه، عزتونه او ځانونو د هر ډول ګواښ څخه خوندي دي؛ په ازاد ډول ژوند کوي چې هیڅ ډول ګواښ ورته نه دی متوجې، زما په اند په څو لسیزو کې له دې ډول امنیت څخه مو هېوادوال نه ؤ برخمن، نو راځئ چې له دې فرصته استفاده وکړو او د الله راکړو نعمتونو باندې شکر وباسو.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.