کابل: سروبي ولسوالۍ کې د ۲ مېلیونه امریکايي ډالرو په ارزښت ۸ کرنیزې پروژې پرانیستل شوې

د کرنې، اوبو لگولو او مالدارۍ وزارت مسوولین وايي، د کابل په سروبي ولسوالۍ کې یې د ۲ مېلیونه او ۸۰۰ زره امریکايي ډالرو په ارزښت د کرنې، اوبو لگولو، بڼوالۍ او مالدارۍ په برخه کې یو شمېر ټولگټې پروژې پرانیستې.
له یاد وزارت څخه په خپره شوې خبرپاڼه کې ویل شوي، یادې پروژې د روپاني بنسټ له لوري د کرنې وزارت په همکارۍ پیل شوې وې.
د کرنې وزارت مرستیال مولوي صدراعظم عثماني د یادو پروژو د پرانیستې په مراسمو کې وویل، هڅه کوو چې خلکو ته اسانتیاوې برابرې کړو او خپلو محصولاتو ته نړیوال بازار پیدا کړو.: «دا زموږ مسوولیت دی چې د اړو خلکو پوښتنه وکړو او د دوی ستونزو ته رسېدنه وکړو، په همدې موخه موږ هڅه کوو، چې هغه پروژې پلې کړو، چې روڼتیا ولري او خلکو ته اغېزمنې تمامې شي. زموږ ټوله هڅه د حلال، سالم، معیاري او لوړ کیفیت لرونکي څارویو لپاره خوراکي توکو چمتو کول دي. له نېکه‌مرغه زموږ د بزګرانو او بڼوالو محصولات د اروپا، امریکا او اسیا لویې وچې هېوادونو ته صادرېږي، هلې ځلې کوو چې د سړخونو په جوړولو، د محصولاتو د معیاري کولو مرکزونو او د باکیفیته محصول په تولید سره د دغو صادراتو کچه لوړه کړو.»
د روپاني بنسټ مسوول انجینر حامد رحماني د دغو پروژو د پرانیستې په مراسمو کې وویل، د دغو پروژو ټولیز لگښت دوه مېلیونه او ۸ سوه زره امریکايي ډالرو ته رسېږي، چې له ډلې یې ۸ پروژې بشپړې شوې او د شپږو نورو پروژو کارونه اوس پیل شوي دي.:«په بشپړو شوو پروژو کې د فرمان بېگ سیمې د گرگري استنادي دېوال جوړول، د فرمان بېگ د اوبو زېرمه، د تورکې د اوبو لگولو کانال او د تورکې د اوبو زېرمه، د انارو د بڼ جوړول او مومند دهي په سیمه کې د لمریز سیستم نصبول، د نغلو او سرچینو په سیمه کې د سړو خونو جوړول او د سروبي ۴۰ کلیو اوسېدونکو لپاره شخصي بڼونه جوړول شامل دي.»
د رحماني په خبره، د دغو پروژو جوړولو ۹ میاشتې وخت ونیو او د سیمې څه باندې ۲ زره کسانو ته پکې د کار زمینه هم برابره شوې وه. : «کومې پروژې چې سږکال د روپاني بنسټ له خوا پلې کېږي، لګښت یې یو مېلیون ډالرو ته رسېږي، چې پکې د ناګمان د اوبو زېرمه، د کب روزنې پينځه فارمونه جوړول، د نیالګیو کېنولو لپاره ۸۰۰ غوچوړې کېندل، ۸۵۸ کورني باغچې جوړول او د سروبي پر یو شمېر اوسېدونکو د لاسي کراچیو وېش شامل دي، چې کارونه یې پیل شوي دي او ورسره به زرو کسانو ته د کار زمینه برابرېږي.»
په هېواد کې د سرتاسري امن له برکته اوسمهال د هېواد په گوټ گوټ کې زرگونه بېلابېلې پروژې تر کار لاندې دي، چې ځینې یې بشپړې شوې او ځینې د بشپړېدو په حال کې دي.
د هېواد بزگران له حکومت غوښتنه کوي، چې محصولاتو ته یې نړیوال بازار پیدا شي او په ښه بیه وپلورل شي.