راپورونه ښيي، چې ټاکل شوې نن ورځ، کابل پوهنتون کې د افغان حکومت د مشرتابه د فرمانونو د اغېزو په اړه علمي او څېړنیز کنفرانس د وردګ پوهنتون په کوربتوب پیل شي، چې څلور ورځې به دوام وکړي.
د معلوماتو له مخې، د یاد کنفرانس لپاره تر ۱۲۰۰ پورې څېړنیزې مقالې چمتو او د وړاندې کولو لپاره برابرې شوې دي. په دې علمي غونډه کې به د مشرتابه د فرمانونو اغېزې په شپږو برخو؛ اسلامي قیادت، شرعي، ټولنیز، سیاسي، اقتصادي او فرهنګي اړخونو کې وڅېړل شي.
د معلوماتو له مخې، کنفرانس ته د هېواد له بېلابېلو ولایتونو دیني عالمان، د پوهنتونونو استادان او د دیني مدرسو ښوونکي رابلل شوي دي.


