د کابل ولایت مقام رسنیو دفتر په یوه خبرپاڼه کې ویلي، چې د هېواد د اووه زونونو د واليانو د همغږۍ مجلس نوبتي غونډه په کابل کې ترسره شوې، چې د امنیت د ټینګښت، د قاچاق او نشهيي توکو د مخنیوي، د کانونو د قانوني استخراج، د راستنېدونکو کډوالو د ستونزو او د عامه خدمتونو د ښهوالي په اړه پکې بحثونه شوي دي.
د کابل ولایت مقام د رسنیو دفتر د معلوماتو له مخې، په دې غونډه کې د کابل، کندهار، بلخ، هرات، ننګرهار، کندوز او پکتیا والیانو ګډون کړی و.
د غونډې د اجنډا له مخې، ګډونوالو د زونونو د همغږۍ مجلسونو راپورونه، پرېکړې او وړاندیزونه څېړلي او د مشرتابه د فرمانونو او حکمونو پر اغېزناک تطبیق، د سرحدي چارو پر تنظیم، د قاچاق او نشهيي توکو د کښت، لېږد او پېر وپلور پر مخنیوي، د امنیتي او ملکي چارو پر ښه تنظیم، د کانونو پر قانوني استخراج او قراردادونو او د کاري فرصتونو پر برابرولو یې خبرې کړي.
د خبرپاڼې په وینا، غونډه کې د لویو لارو د عبور او مرور د اصولو د مراعاتولو، د کرنیزو ځمکو د اجارې او د مهاجرینو او راستنېدونکو د ستونزو ترڅنګ، په زونونو کې د خوړو او درملو د کیفیت د معاینې لابراتوارونو جوړولو، د حوزوي روغتونونو د پیاوړتیا او معیاري کولو او د تعلیمي او روغتیايي خدمتونو د ښهوالي موضوعات هم مطرح شوي