د کورنیو چارو وزارت د نشهيي توکو پر وړاندې د مبارزې معینیت وايي، د کابل اړوند د نشهيي توکو پر وړاندې د مبارزې مدیریت مسوولینو په دغه ښار کې ۲۴ تنه د نشهيي توکو د پلور، استعمال او لېږد په تړاو نیولي دي.
له یاد معینیت څخه په خپره شوې خبرپاڼه کې ویل شوي، یاد کسان د کابل ښار په بېلابېلو سیمو کې نیول شوي دي او له نیول شوو کسانو څخه ۱.۸۰۲ کیلو گرامه چرس، ۸۷۰ گرامه تریاک، ۱۸ گرامه شیشه او ۱۹۷۶ عدده نشهيي گولۍ تر لاسه شوې دي.
همدارنگه یاد معینیت ویلي، د روزگان په گېزاب او چهارچینو ولسوالیو کې یې د نشهيي توکو د پروسس او تولید دوې کارخونې کشف او سوځولې دي.
په خبرپاڼه کې ویل شوي، په یادو کارخونو کې ۳۶۰۰ کیلو گرامه ومان، ۴۰۰ کیلو گرامه بېلابېل ډوله کېمیاوي توکي او د پروسس مواد په بشپړ ډول له منځه وړل شوي دي.
د خبرپاڼې له مخې، د سمنگان په درهصوف ولسوالۍ کې سپینږیرو ۳ کیلو گرامه هیرویین د نشهيي توکو پر وړاندې د مبارزې مدیریت ته سپارلي دي.
د افغان حکومت له لوري د نشهيي توکو پر وړاندې جدي مبارزه روانه ده، چې اوسمهال د نشهيي توکو کښت صفر شوی، خو نور نشهيي توکي د گاونډیو هېوادونو څخه په قاچاقي ډول راوړل کېږي.
د کابل امنیه قومندانۍ مسوولین وايي، د نشهيي توکو د مافیا پر وړاندې یې مبارزه پیل کړې؛ خو د نشهيي توکو مافیا نړیواله ده او په یو مخیز ډول بندول یې وخت غواړي.
په تېرو څه کم درېیو کلونو کې د هېواد له ټولو ولایتونو زرگونه تنه هغه خلک راټول شول چې پر نشهيي توکو روږدي وو.
د یادو روږدو د درملنې سربېره اوس د حرفوي زدهکړو پروگرام هم روان دی چې گڼو پر نشهيي توکو روږدو پکې حرفوي زدهکړې تر لاسه کړې دي.