د کډوالو او بېرته راستنېدونکو چارو وزارت وايي، په کندوز کې یې د قابلهگۍ د درې کلن کورس لپاره له نوو راستنو شوو نجونو څخه رقابتي ازموینه اخیستې ده.
له یاد وزارت څخه په خپره شوې خبرپاڼه کې ویل شوي، په کندوز کې د قابلهگۍ د درې کلن کورس د گمارنې په موخه یې له ۲۳۴ نجونو څخه رقابتي ازموینه اخیستې.
په خبرپاڼه کې ویل شوي، یاده سیالي د کندوز د کډوالو او عامې روغتیا ریاستونو له لوري پیل شوې وه.«د يادو شوو کسانو له جملې څخه ٨٠ مېرمنې، چې لوړې نمرې تر لاسه کړي د هغه ولايت د عامې روغتيا رياست په همغږۍ او د پناغوښتونکو په چارو کې د ملگرو ملتونو د عالي کمېشنرۍ په همکارۍ به حکمت انسټېټيوټ ته د درې کلن قابلهگۍ کورس لپاره ور معرفي شي. یادو زده کوونکو فیس، کتابونه، قرطاسیې او د ترانسپورټ کرایه د یاد سازمان له لوري ورکول کېږي.»
که څه هم اوسمهال د نجونو پرمخ د لوړو زدهکړو او د لېسې دورې د زدهکړو دروازې بندې دي؛ خو په روغتیايي نسټېټيوټونو کې لا هم زرگونه نجونې په بېلابېلو برخو کې پر زدهکړو بوختې دي.