د کورنیو چارو وزارت افغانستان کې د نشه یي توکو د کښت په اړه د سیګار راپور چې د ځینو بهرنیو بنسټونو اندېښنې یې راپارولې دي بې ځایه بللی دی.
د افغانستان د بیارغونې لپاره د امریکا ځانګړي مفتش په خپل وروستي راپور کې ادعا کړې، چې په افغانستان کې د نشه یي توکو کاروبار لاهم دوام لري، خو کورنیو چارو وزارت دغه راپور رد او بې ځایه بللی دی.
کورنیو چارو وزارت د یوې خبرپاڼې په خپرولو سره ویلي، تېرو درېیو کلونو کې د افغانستان خلکو او نړېوالو ته ثابته شوې، چې له څو لسیزو را وروسته په لومړي ځل ټول هېواد کې د نشه یي توکو پدیده له منځه تللې او د نږدې ټولو روږدو درملنه شوې ده.
په خبرپاڼه کې ویل شوي، چې د افغانستان اوسني حکومت د محدودو امکانانو سره وتوانېد د نشه یې توکو کرکېله له منځه یوسي او په راتلونکي کې به هم اجازه ورنکړي چې د تېرو کلونو په څېر افغانستان یو ځل بیا د نشه یې توکو د سوداګرۍ او قاچاق په مرکز بدل کړي.
دا په داسې حال کې ده چې په وروستيو درې کلونو کې افغانستان کې د نشه يي توکو پر وړاندې مبارزه تر ټولو چټکې کچې ته رسېدلې په ميليونونو هکټاره ځمکه یې له کښت پاکه شوې، قاچاق کوونکي نیول شوي، او د روږدو کسانو د علاج زمينه برابره شوې.