له افغانستان څخه تښتېدلي او ماتې خوړلي سیاستوال، چې په تېرو دریو کلونو کې له پرله پسې ناکامیو، بې پایلو ناستو او هڅو کومه نتیجه نه ده ترلاسه کړې، اوس کوښښ کوي خپل پلویان د خیالي هیلو په تمه وساتي.
په دې وروستیو کې د مقاومت جبهې د یوه قوماندان (خیرمحمد خیرخوا) د وژل کېدو د کلیزې په مناسبت، په لندن کې ناسته وشوه. په دې ناسته کې ځینو ناکامو څهرو چې یونس قانوني هم پکې و، آنلاین خبرې وکړې او ګډونوالو ته یې ډاډ ورکړ چې «۲۰۲۵ کال به د سترو بدلونونو کال وي» او مهم تغییرات را روان دي.
یونس قانوني دا څرګندونې داسې مهال کوي چې د جمهوريت له سقوط راهیسې، د سرپرست حکومت د مخالفینو ناستې او هڅې، د ژورو اختلافاتو له امله تل بېپایلې پاتې شوې او د دوی پلویان یې لا زیات ناهیلي کړي دي.
له هغه وخته چې جمهوريت ړنګ شو او اوسنی سرپرست حکومت واک ته ورسېد، تښتېدلو سیاسي څهرو د بهرنیو استخباراتي سازمانونو د مالي ملاتړ د ترلاسه کولو او امتیازونو د اخېستلو لپاره، بېلابېل ګروپونه جوړ کړل او ګڼې ناستې یې ترسره کړې. خو په امتیازاتو د نه جوړېدو له امله یې اختلافات لاپسې ژور او دوی یو له بل څخه لیرې شول.
په هغه غږیزو فایلونو کې چې د پخواني حکومت د کورنیو چارو له وزیر مسعود انداربي څخه افشاء شوي، نوموړي احمد مسعود «ماشوم» او بسمالله خان، د هغه وخت دفاع وزیر، «پچه» بللی و. همدا راز د جمعیت ګوند د مشر، عطامحمد نور مرکې چې احمد مسعود یې «بې تجربې هلک» یاد کړی و؛ دا ټول د سرپرست حکومت د مخالفینو ترمنځ د ژورو اختلافاتو ښکاره بیلګې او ثبوتونه دي.
پر دې سربېره هغه غږیز کلیپونه چې له عبدالستار حسيني او عیسی محمدي څخه افشاء شوي، ښيي چې «آزادۍ» او «مقاومت» جبهې له یو بل سره دومره ژور اختلافات لري، چې هوارول یې ناشوني ښکاري.
په داسې حال کې چې د سرپرست حکومت د مخالفینو ترمنځ دومره ژور اختلافات موجود دي، د داسې یو بدلون تمه چې د دوی په ګټه وي، له خیالي وهمونو پرته بل څه نه دي. دا ادعاوې به هېڅکله عملي بڼه غوره نه کړي او حقیقت ته به ونه رسېږي.
په دې شرایطو کې د بدلون تمه نه یوازې یوه ساده خوشبیني ده، بلکې دا ښيي چې یونس قانوني او د هغه همفکران هڅه کوي په دې دروغجنو ژمنو سره د خپلو غونډو ناکامي پټه کړي او خپل پلویان د واقعیتونو له درک څخه لرې وساتي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.