د بغلان ولایت په نهرین ولسوالۍ کې تېره شپه د شر او فساد ډلې اته تنه غړي له گڼو وسلو او مهماتو سره یو ځای نیول شوي دي.
د بغلان امنیتي مسوولین وايي، نیول شوو کسانو غوښتل چې په دغه ولایت کې د امنیت ضد کړنې وکړي؛ خو د بغلان د استخباراتو ریاست له لوري مخکې له مخکې ونیول شول او پلانونه یې شنډ شول.
د هېواد په مرکزي، شمالي او شمال ختیځو ولایتونو کې وخت نا وخت د شر او فساد ډلې په نامه غړي د امنیت ضد کړنو په تړاو نیول کېږي.
د جمهوریت د سقوط سره سم په هېواد کې په بېلابېلو نومونو ډلې جوړې شوې دي، چې د ټولو ډلو مشران په امریکا او اروپا کې دي او غواړي په افغانستان کې د اوسنیو حاکمانو پر وړاندې امنیتي ستونزې راپیدا کړي، چې د ډېرو بریدونو مخه نیول شوې ده، د شر او فساد ډلې گڼ غړي له منځه وړل شوي.
نږدې یوه اوونۍ وړاندې په کاپیسا کې هم د دې ډلې دوه غړي له منځه وړل شوي وو او یو تن یې د استخباراتو له لوري ژوندی نیول شوی و.