فرانسوي لومنډ مجلې په یو مطلب کې لیکلي چې طالبانو په افغانستان کې د داعش په خراسان څانګې کړۍ راتنګه کړې ده.
مطلب کې ویل شوي چې د داعش – خراسان جنګیالیو اوس په منځنۍ اسیا کې ځان ته نوی ځای موندلی دی.
په مسکو کې د داعش – خراسان د تیرې اوونۍ خونړي برید کې ۱۴۴ کسان ووژل شول او لسګونه نور ټپیان شول.
دغه برید کې څلور تنه تاجکستانیان ښکیل وو چې د روسي عسکرو له لوري ژوندي نیول شوي او اوس یې محاکمه روانه ده.
په افغانستان کې د طالبانو بیا واک ته رسیدو مخکې او وروسته داعش – خراسان سخت ځپل شوی دی او افغان حکومت یې له برید وړاندې ډیر بریدونه شنډ کړي دي او ګڼ کسان یې نیولي دي.
بلخوا رویټرز بیا په خپل یو راپور کې چې دوه ورځې وړاندې نشر شوی ویلي چې د داعش – خراسان څانګې مشر ثناء الله غفاري له افغانستانه په ټپي حالت کې تښتیدلی او اوس د پاکستان بلوچستان کې ژوند کوي.
۲۹ کلن ثناءالله غفاري چې په شهاب المهاجر هم مشهور دی، په ۲۰۲۰ کې د داعش – خراسان څانګې مشر ګومارل شوی دی.
داسې ګومان کیږي چې داعش – خراسان اوس د طالبانو د سخت فشار له امله د افغانستان په ګاونډ کې د طالبانو پر ضد ځان منسجم کوي او له هماغه ځایه د بریدونو طرحې جوړوي، خو بریدونه یې د افغان حکومت له لوري له واقع کیدو مخکې خنثی کیږي.
نړۍ ته په کار ده چې د داعش د ځپلو له پاره له افغان حکومت سره همغږي وکړي او تجربې یې ترلاسه کړي.