د کورنیو چارو وزارت وايي، د هېواد په بېلابېلو ولایتونو کې یې لسگونه تنه د بېلابېلو جرمونو په تور نیولي او همدارنگه یې د هېواد په ځینو سیمو کې سلگونه جریبه ځمکه د کوکنارو کروندې اړولې دي.
له یاد وزارت څخه په خپره شوې خبرپاڼه کې ویل شوي، د نشهيي توکو پر وړاندې د مبارزې پوليسو د يو لړ بېلابېلو عملياتو په ترڅ کې په ننگرهار کې ۷۴ جريبه او په نيمروز ولايت کې څه باندې ۳ جريبه ځمکه د کوکنارو له بوټو پاکه کړه. دغه راز پوليسو د نيمروز په دلارام ولسوالۍ کې ۳ تنه د ٦٥ کيلوگرامو اپينو د قاچاق په تور ونيول.
همدارنگه د هلمند د امنيې قوماندانۍ د منسوبينو په تېرو ۲۴ ساعتونو کې د دغه ولايت په مرکز لښگرګاه ښار کې ۱۹ تنه دغلا په تړاو نيولي دي.:«له نیول شوو کسانو څخه د ۷۰۰ زره افغانیو په ارزښت سره زر، ۶۹ زره افغانۍ کریډیټ کارت، ۱۵ عرادې موټرسایکلونه، د څاروي او نور غلا شوي توکي تر لاسه شوي دي.»
د کورنیو چارو وزارت وايي، هڅه کوي په هېواد کې ټول کرل شوي کوکنار له منځه یوسي.