د افغانستان ستره محکمه وايي، د لوگر د محمداغې ولسوالۍ ابتدایه محکمې د حکم پر بنسټ د یوې ښځې په گډون شپږو تنو ته چې په لواطت او زنا متهم وو په عام محضر کې تعزیري سزا ورکړل شوه.
له سترې محکمې څخه په خپره شوې خبرپاڼه کې د لوگر د جهادي مدرسې مهتمم عبدالله سليم له قوله ویل شوي، چې په کومه ځمکه چې د الله ﷻحکم عملي شي هلته څلوېښت کاله د الله ﷻ رحمت نازلېږي.: «موږ د الله تعالی ډېر شکر گزار يو چې زموږ پر ژوند يې اسلامي نظام حاکم کړ، دا دی اوس د الله تعالی احکام جاري کوو، په تعزير او حدودو سره ټولنه له فساده پاکېږي او په کومه ځمکه چې د الله تعالی حدود جاري شي، څلوېښت کاله په هغه ځمکه د الله تعالی رحمت نازلېږي.»
په خبرپاڼه کې د محمداغې ولسوالۍ د ابتدایه محکمې قاضي روح الله غالب له قوله ویل شوي، موږ ژمن يو چې د الله تعالی احکام به په دې ځمکه جاري کوو او په دې برخه کې له هېچا وېره هم نه لرو.
د يادونې وړ ده، چې مربوطه محکمې د یادو متهمینو له ډلې يو متهم ته د (۳۵) دُرو تعزيري سزا او يو کال تنفيذي بند، دويم متهم ته د (۲۵) دُرو تعزيري سزا او يو کال تنفيذي بند، درېيم متهم ته د (۳۹) دُرو تعزيري سزا او يو کال تنفيذي بند، څلور متهم ته د (۳۵) دُرو تعزيري سزا او دوه کاله تنفيذي بند، پینځم متهم ته د (۳۹) دُرو تعزيري سزا او دوه کاله تنفيذي بند او شپږمې متهمې ته د (۳۵) دُرو تعزيري سزا او دوه کاله تنفيذي بند حکم کړی و، چې ياد حکم د سترې محکمې د عالي مقام له تایید وروسته پر متهمينو تطبيق شو.