د اسلامي همکاریو سازمان مرستیال او د افغانستان لپاره د یاد سازمان د سر منشي ځانگړي استازي طارق علي بخیت د ریاست الوزراء اداري مرستیال مولوي عبدالسلام حنفي سره لیدلي او په دوه اړخیزو همکاریو یې خبرې کړې دي.
له ارگ څخه په خپره شوې خبرپاڼه کې ویل شوي، په بشري، کلتوري او ټولنیزو چارو کې د اسلامي همکاریو سازمان له مرستیال او افغانستان لپاره د یاد سازمان د سرمنشي ځانگړي استازي طارق علي بخیت او مل پلاوي سره چې د بشري حقونو، اقتصاد، ټولنیزو او ځوانانو چارو مسوولینو هم پکې حضور درلود، وکتل.
په خبرپاڼه کې د حنفي له قوله ویل شوي، چې اسلامي امارت د اسلامي همکاریو سازمان ته درناوی لري او د یاد سازمان د مسوولینو مشورو د قدرداني ترڅنگ یې له افغانستان سره د اړیکو لا زیاه او پراختیا غواړي.
د اسلامي همکاریو سازمان استازي طارق علي بخیت ویلي، دغه سازمان به د افغانستان ستونزې او واقعي تصویر نړۍ ته منعکس کړي.:«د اسلامي نړۍ درد او رنځ شریک دی او باید اسلامي هېوادونه د دغو ستونزو د حل په موخه گډې هڅې وکړي.»
ښاغلي حنفي ویلي، افغانستان له جنگ څخه د حکومتولۍ پر لوري گام اخلي، بناً په بېلابېلو برخو کې د اسلامي همکاریو سازمان مرستو ته اړتیا ده او ټینگار یې وکړ چې د اسلامي امارت استازي دې په گامبیا کې د دغه سازمان په راتلونکی غونډه کې وروبلل شي، ترڅو د اسلامي همکاریو سازمان د مسوولینو مشورې واوري او ترڅنگ یې په افغانستان کې موجوده واقعیتونه هغوی ته ورسوي.: «د اسلامي امارت پالیسي داده چې د افغانستان له خاورې به هېچاته گواښ نه متوجه کېږي، موږ پر اقتصاد محوره سیاست تمرکز لرو او د هېڅ هېواد په چارو کې لاسوهنه نه کوو، خو له هغوی هم غواړو چې د افغانستان په کورنیو چارو کې له لاسوهنې ډډه وکړي.»
د اسلامي همکاریو سازمان د بشري حقونو خپلواک کمېسیون اجرائيوي رئیسې نوره الرشود ویلي، افغانستان ته یې د خپل سفر پر مهال ښه پرمختگونه لیدلي، دا د هغه منفي انځور برعکس دي چې د افغانستان په اړه په رسنیو کې منعکسېږي.
نوموړې ویلي، موږ له افغانستان سره په بېلابېلو برخو کې همکارۍ ته چمتو یو.