مالیزیا د لومړي وزیر استازې په ډاکټرې شاهزلینا په مشرۍ پلاوي په کابل کې له بېلابېلو مسوولینو سره لیدلي او د دواړو هېوادونو د اړیکو په پراختیا یې خبرې کړې دي.
د ریاست الوزراء سیاسي مرستیال مولوي عبدالکبیر وايي، د مالیزیا لومړي وزیر د استازې په مشرۍ د مالیزیا د لومړي وزیر د دفتر، دفاع، کورنيو او بهرنیو چارو وزارتونو له استازو سره په سپېدار ماڼۍ کې یې لیدلي دي.
له ارگ څخه په خپره شوې خبرپاڼه کې ویل شوي، د مالیزیا لومړي وزیر استازې ویلي، د مالیزیا لوړ پوړي چارواکي د افغانستان په هکله مثبت نظر لري او حاظر دي چې له افغانستان اسلامي امارت سره په بېلابېلو برخو کې همکاري وکړي.: «پر اسلامي امارت د بنديزونو باوجود افغانستان په ځینو برخو کې ښه پرمختگونه کړي، خو له بدهمرغه نړیوالې رسنۍ په افغانستان کې د لاسته راوړنو د پیکه کولو هڅه کوي.»
په خبرپاڼه کې د مولوي عبدالکبیر له قوله ویل شوي، چې دغه ډول ناستې به د کابل ـ کولالمپور ترمنځ اړیکې لا پیاوړې کړې.:«د افغانستان عیني شرایط او وضعیت د هغه څه خلاف دي چې غربي رسنۍ یې په هکله په خپلو راپورونو کې يادونه کوي، ځکه ځینې کړۍ د افغانستان پرمختگ او ارامي نهشي زغملی.»
نوموړي ویلي، اسلامي امارت په افغانستان کې بشپړ امن حاکم کړی، له همدې امله مالیزیايي پانگهالو ته په هېواد کې د پانگونې بلنه ورکوي، ترڅو د سوداگرۍ سربېره د دواړو هېوادونو تر منځ د مثبتو اړیکو سبب هم شي.: «اسلامي امارت دا مهال له تېر حکومت څخه په میراث له ورپاتې فقر سره مبارزه کوي څو د افغانانو په ژوند کې مثبت بدلون راشي، خو په دې برخه کې د نړیوالو همکاریو ته هم اړتیا لیدل کېږي.»
یاد پلاوي په کابل کې د افغانستان د بهرنیو چارو وزیر مولوي امیرخان متقي سره هم لیدلي دي.
له بهرنیو چارو وزارت څخه په خپره شوې خبرپاڼه کې ویل شوي، د بهرنیو چارو وزیر مولوي امیر خان متقي د افغانستان او مالیزیا د ولسونو او حکومتونو ترمنځ شته دیپلو ماتیکي، دیني، کلتوري او اقتصادي اړېکې د لا پراخوالي په حال کي وبللې او د تاریخ په اوږدو کې له افغانستان سره د مالیزیا د ښه نیت، د بشري مرستو په ځانگړي ډول د هرات د وروستۍ زلزلې له قربانیانو سره د مالیزیا له مرستو مننه وکړه.:«افغانستان په سیاسي او اقتصادي ډگر کې متوازن او اقتصاد محوره بهرنی سیاست تعقیبوي. له نړيوالې ټولنې سره د افغانستان اړيکې مخ پر پراخېدو دي او له گاونډيو او سيمهييزو هېوادونو سره يې ښې اړيکې ټينگې کړې دي.»
په دې لیدنه کې د مالیزیا استازې ویلي، مالیزیا هوډ لري چې د افغان دیپلوماتانو لپاره د لنډ مهاله روزنیزو پروگرامونو د تنظیم، د معلوماتي ټکنالوجۍ په برخه کې د روزنیزو پروگرامونو، د افغان ملکي خدمتونو د کارکوونکو لپاره د محاسبې او پراختیا او په دې برخه کې د مسلکي پروگرامونو د تنظیم په برخه کې له افغانستان سره همکاري وکړي.