د احصایې او معلوماتو اداره وايي، پرو سږکال(۱۴۰۲)ل کال کې یې په پروان کې په ټولیز ډول ۹۰زره او ۱۴۳ کسانو ته پېژندپاڼې وېشلې دي، چې ۳۶زره او ۱۳۳ برېښنايي او ۵۴زره او ۱۰ نورې کاغذي پېژندپاڼې دي.
له یادې ادارې څخه په خپره شوې خبرپاڼه کې ویل شوي، په پروان کې هره ورځ شاوخوا ۵۰۰ کسان د برېښنايي او کاغذي پېژندپاڼو اړوند خدمتونو د تر لاسه کولو په موخه د دې ریاست اړوند دفترونو ته مراجعه کوي.:«د مرکز په گډون د دې ولايت په ټولو ولسواليو کې د دوی اړوند دفترونه فعال دي او پرو کال د يادو دفترونو له لارې توانېدلي دي چې ۶ زره کسانو ته په کاغذي پېژندپاڼو کې د اصلاحاتو او ۷ زره او ۱۷۹ نورو کسانو ته د ژوند پېښو (زېږون کارتونه، د مړینې پارچې، ودونو او طلاق ثبت) اړوند خدمتونه وړاندې کړي.»
په خبرپاڼه کې ویل شوي، په پروان کې د برېښنايي پېژندپاڼو د وېش دوې څانگې فعالې دي.
د هېواد په گوټ ـ گوټ کې خلک شکایت کوي چې د برېښنايي پېژندپاڼو اخیستو ته میاشتې ـ میاشتې انتظار کوي او هم یې د پخوا په پرتله بیه څو برابره لوړه شوې ده.