د ننگرهار امنیتي مسوولین وايي، د دغه ولایت په پچیراگام ولسوالۍ کې امنیتي ځواکونو هغه ۷تنه نیولي، چې په ځنگل کې یې ونې پرې کړې وې او چارتراشې یې ترې جوړې کړې وې.
د ننگرهار له امنیه قومندانۍ څخه په خپره شوې خبرپاڼه کې ویل شوي، یاد کسان یې د پچیراگام ولسوالۍ په مېلوې سیمه کې نیولي دي او ورسره یې ۲۰ چارتراش هم نیولي دي.
د خبرپاڼې له مخې، نیول شوي کسان به د قانوني اجرااتو په موخه عدلي ـ قضايي ارگانونو ته ورپېژندل شي.
تېره اوونۍ په هلمند کې هم پینځه تنه د ځنگل وهلو په تور نیول شوي و.
د ځنگلونو او نورو طبیعي سیمو د ساتنې لپاره اوسمهال ځانگړې(زرغونه) قطعه جوړه شوې او د یادې قطعې دنده دا ده چې د هېواد د ټولو ځنگلونو ساتنه وکړي.
ځنگلونه تقریبا د یو مېلیارد څخه زیاتو کسانو لپاره د غذا، سون، ښکار او نورې سرچینې برابروي. ځنگلونه د اوبو او خاورې څخه ساتنه هم کوي.
ځنگلونه د ځمکې ټولو ژوندیو اجسامو څلورمې برخې ته په خپلې غېږ کې ځای ورکړی چې د اب او هوا له بدلون سره هم مقابله کوي.
د افغانستان د ځنگلونو زیاته برخه یعنې یو مېلیون او درې سوه زره هکټاره د کونړ، لغمان، نورستان، پکتیا، پکتیکا، ننگرهار او خوست په ولایتونو کې دي. پاتې ځنگلونه چې زیاتره یې د پستې او غرنیو بادامو دي، د هېواد په شمال، شمال لوېدیځ تخار، کندوز، سمنگان، جوزجان، بلخ، فاریاب، بادغیس او د هرات په شمال ختیځو ساحو کې دي.