د افغان حکومت اقتصادي مرستیال ملا عبدالغني برادر د صادراتي محصولاتو د پروسېس شپږ زونونو جوړولو ته په اشارې ویلي، چې دا مهال د هېواد له ۱۳ ولایتونو بهر ته صادرات کیږي.
نوموړي زیاته کړې، چې د سوداګرو لپاره د لا زیاتو اسانتیاو د رامنځ ته کولو او د سوداګریزو تعرفو د ښو کولو په موخه له بېلابېلو هېوادونو سره خبرې کوي.
د ښاغلي برادر په خبره افغان حکومت د صادراتو د کیفیت ښه کېدو په موخه د هېواد د بندرونو معیاري کولو په اړه له یو شمېر بهرنیو شرکتونو سره هم خبرې کوي.
په ورته مهال د صنعت او سوداګرۍ وزیر نورالدین عزیزي د افغانستان د صادراتو د زیاتوالي او توازن په موخه د پنځه کلن پلان د عملي کېدو خبر هم ورکړی دی.
دا په داسې حال کې ده، چې په د وروستیو کې د افغاني تولیداتو په اړه د بېلابېلو نندارتونو د جوړېدو له امله ښه بازار مونده شوې ده او د نړۍ له بېلابېلو هېوادونو سره د افغانستان د سوداګرۍ لمن مخ په پراخېدو ده.